ప్రపంచంలో ఆరో ధనవంతుడిగా...భారత్, ఆసియాలో తొలి స్థానంలో

భారతదేశ అత్యంత కుబేరుడైనా వారిలో ఇపుడు అదానీ పేరు వినిపిస్తోంది. అదానీ గ్రూప్ ఫౌండర్, చైర్మన్ గౌతమ్ అదానీ దూసుకుపోతున్నారు. ఎనర్జీ, పోర్ట్స్, మైనింగ్, ఎడిబుల్ ఆయిల్ ఇలా పలు రంగాల్లో వ్యాపారాలు నిర్వహిస్తున్న గౌతమ్ అదానీ సంపద విలువ భారీగా పెరిగింది. ఫోర్బ్స్ రియల్ టైమ్ బిలియనీర్ ఇండెక్స్ ప్రకారం.. ఈయన సందప విలువ 120 బిలియన్ డాలర్లకు ఎగసింది. దీంతో ఈయన ప్రపంచంలోనే ఆరో అత్యంత ధనవంతుడిగా నిలిచారు. అదానీ గ్రూప్ లిస్టెడ్ స్టాక్స్ విలువ పెరగడం ఇందుకు ప్రధాన కారణంగా చెప్పుకోవచ్చు. ఇక భారత్, ఆసియాలో ఈయనే అత్యంత ధనవంతుడు.

గౌతమ్ అదానీ గూగుల్ ఫౌండర్స్ లారీ పేజ్, సెర్జిన్ బ్రిన్ వంటి వాటిని కూడా అధిగమించారు. అదానీ గ్రీన్ ఎనర్జీ, అదానీ ఎంటర్‌ప్రైజెస్, అదానీ గ్యాస్, అదానీ ట్రాన్స్‌మిషన్ వంటి షేర్ల ధరలు సోమవారం పెరగడం వల్ల అదానీ సంపద కూడా పైపైకి కదిలింది. ఏకంగా రూ.65,091 కోట్ల సంపద పెరిగింది. అయితే సోమవారం రోజున మార్కెట్ పడిపోయిన విషయం తెలిసిందే. అయినా కూడా అదానీ షేర్లు 16 శాతం వరకు పెరిగాయి.

ఈ ఏడాదిలో గౌతమ్ అదానీ సంపద విలువ దాదాపు 41.6 బిలియన్ డాలర్ల మేర పెరిగింది. ప్రపంచంలో మరే ఇతర సంపన్నుల సంపద ఈ స్థాయిలో పెరగలేదు. అలాగే ముకేశ్ అంబానీ సంపద విలువ 97.4 బిలియన్ డాలర్లుగా ఉంది. ఇప్పుడు ఈయన 10వ స్థానంలో ఉన్నారు. ఈ ఏడాది ఇప్పటి వరకు చూస్తే అంబానీ సంపద విలువ 7.45 బిలియన్ డాలర్ల మేర పైకి చేరింది. అంబానీ కన్నా అదానీ సంపద విలువ ఏకంగా 20.6 బిలియన్ డాలర్లు ఎక్కువగా ఉండటం గమనార్హం. అంటే అదానీని వెనక్కు నెట్టడం అంబానీకి ఇప్పుడు అసాధ్యమనే చెప్పుకోవాలి.

గత 14 ఏళ్లుగా ముకేశ్ అంబానీ దేశంలోనే అత్యంత సంపన్నుడిగా కొనసాగుతూ వచ్చారు. అయితే ఇప్పుడు పరిస్థితులు మారిపోయాయి. అదానీ రేసులోకి వచ్చారు. గత వారంలో అదానీ సంపద విలువ 100 బిలియన్ డాలర్లు దాటిపోయింది. కాగా టెస్లా చీఫ్ ఎలన్ మాస్క్ ప్రపంచంలో అత్యంత సంపన్నుడిగా ఉన్నారు. ఈయన సంపద విలువ 262 బిలియన్ డాలర్లు. ఈయన తర్వాతి స్థానంలో వరుసగా జెఫ్ బెజోస్, బెర్నార్డ్ ఆర్నాల్డ్ కుటుంబం, బిట్ గేట్స్, వారెన్ బఫెట్ వంటి వారు ఉన్నారు.