దేశానికి చెందిన విలువైన వస్తువులు, ఆభరణాలు ఇమ్రాన్ ఖాన్ అమ్ముకొన్నాడు

పాకిస్తాన్ లో ఇప్పటికీ రాజకీయ ప్రకంపనలు కొనసాగుతున్నాయి. మాజీ ప్రధాని ఇమ్రాన్ ఖాన్‌పై పాకిస్థాన్ ప్రస్తుతం ప్రధాన మంత్రి షెహబాజ్ షరీఫ్ సంచలన ఆరోపణలు చేశారు. దేశ ఖజానాకు చెందాల్సిన విలువైన వస్తువులు, ఆభరణాలను ఇమ్రాన్‌ ఖాన్‌ అమ్ముకున్నారని ఆరోపించారు. దుబాయ్‌లో విక్రయించిన రూ.5.9 కోట్ల విలువైన వజ్రాల నగలు కూడా ఇందులో ఉన్నాయని తెలిపారు. శుక్రవారం తన నివాసంలో ఏర్పాటుచేసిన ఇఫ్తార్ సందర్భంగా జర్నలిస్ట్‌లతో పాక్ ప్రధాని షెహబాజ్ మాట్లాడుతూ.. ఖజానా నుంచి తీసుకొన్న ఓ వాచ్ ఇప్పటికీ ఇమ్రాన్‌ చేతికి ఉందన్నారు. డైమండ్ నగలు, బ్రాస్లెట్స్, చేతి గడియారాలు సహా విలువైన వస్తువులను దుబాయ్‌లో అమ్మేశారని దుయ్యబట్టారు.

ఖజానా వివరాలను వెల్లడించాలని కోరుతూ ఇస్లామాబాద్ హైకోర్టులో దాఖలు చేసిన పిటిషన్‌పై నాటి ప్రధాని ఇమ్రాన్ ఖాన్ బదులిస్తూ.. అధికారిక రహస్యాల చట్టం 1923 ప్రకారం వివరాలను వెల్లడించలేమని చెప్పారని దీనిపై మీరేమంటారన్న మీడియా ప్రతినిధులు ప్రశ్నకు షెహబాజ్ పై విధంగా స్పందించారు. అయితే, ప్రధాని ఆరోపణలను ఇమ్రాన్‌ ఖాన్‌ అనుచరులు ఖండించారు.

ఇమ్రాన్ ఖాన్‌పై ప్రధాని బురదచల్లుతున్నారని పీటీఐ నేత, మాజీ మంత్రి ఫవాద్ చౌదరి మండిపడ్డారు. కాగా, ఓ నెక్లెస్‌ను ఇమ్రాన్ ఖాన్ తన సన్నిహితుడి ద్వారా రూ.18 కోట్లకు విక్రయించినట్టు వచ్చిన ఆరోపణలపై పాక్ ఫెడరల్ ఇన్వెస్టిగేషన్ ఏజెన్సీ (ఎఫ్ఐఏ) ఇప్పటికే విచారణ ప్రారంభించిన విషయం తెలిసిందే. పాకిస్థాన్ చట్టం నిబంధనల ప్రకారం.. ప్రధాని ఏదైనా ప్రభుత్వం, దేశం నుంచి అందుకున్న బహుమతులను స్టేట్ గిఫ్ట్ రిపోజిటరీ అందజేయాలి. ఒకవేళ, వాటిని తనవద్దే ఉంచుకోవాలని భావిస్తే దాని విలువకు సమానమైన నగదును చెల్లించాలి. రిపోజిటిరీకి వచ్చిన బహుమతులను వేలంలో విక్రయించగా వచ్చిన మొత్తాన్ని జాతీయ ఖజానాకు జమచేస్తారు.

ఇదిలావుంటే ప్రధాన మంత్రి సోదరుడు, మాజీ ప్రధాని నవాజ్ షరీఫ్‌కు హైకోర్టులో ఊహించని షాక్ తగిలింది. నవాజ్‌ షరీఫ్‌కు కొత్త ప్రభుత్వం ఎటువంటి దౌత్యపరమైన పాస్‌పోర్టు జారీ చేయరాదని, ఆయన పాక్‌లో అడుగు పెట్టిన వెంటనే అరెస్టు చేయాలని ఇస్లామాబాద్ హైకోర్టు శుక్రవారం ఆదేశాలు జారీ చేసింది. న్యాయవాది నయీం హైదర్‌ దాఖలు చేసిన పిటిషన్‌పై హైకోర్టు పైవిధంగా స్పందించింది. పలు అవినీతి కేసుల్లో ఆరోపణలు ఎదుర్కొంటున్న నవాజ్ పాక్‌ నుంచి పారిపోయి లండన్‌‌లో ఉన్నారు. సోదరుడు పాక్‌ ప్రధానిగా బాధ్యతలు చేపట్టడంతో ఆయన పునరాగమనానికి మార్గం సుగమం చేస్తున్నారన్న కథనాలు వెలువడుతున్నాయి. ఈ నేపథ్యంలో ఇస్లామాబాద్ హైకోర్టు తీర్పుతో నవాజ్‌ షరీఫ్‌ (72) ఇప్పట్లో మళ్లీ సొంతగడ్డపై కాలుమోపే పరిస్థితులు కనిపించడం లేదు.