అక్కడున్న బాంబులను గుర్తించి..వెలికితీసింది...దేశభక్తిని చాటుకొంది

గట్టిగా నినాదాలు చేస్తేనే దేశభక్తి కాదు. దేశం ఏదైనా చేస్తేనే దేశభక్తి. దేశ భక్తి ఇదేనంటూ ఓ శునకం నేటి తరానికి తెలియజేసింది. యుద్ధ భూమి ఉక్రెయిన్‌లో ఎన్నో చెప్పుకోదగ్గ ఘటనలు చోటుచేసుకుంటున్నాయి. ఎంతోమంది వీరులు తమ ప్రాణాలను మాతృభూమి కోసం అర్పిస్తున్నారు. ఎంతోమంది తల్లులు కడుపుకోతను భరిస్తున్నారు. పిల్లలు తమ కుటుంబాలను కోల్పోతున్నారు. అయినా సరే ఉక్రెయిన్ పౌరులు తమ గడ్డ కోసం పోరాడుతూనే ఉన్నారు. అయితే అక్కడ జంతువులు కూడా పోరాటంలో భాగమయ్యాయి. ఓ రెండేళ్ల కుక్క రష్యా దళాలు పెట్టిన బాంబులను గుర్తించి.. నిర్వీర్యం చేయడంలో సహకరిస్తుంది.

పాట్రన్ (Patron)అనే రెండేళ్ల కుక్క ఉక్రెయిన్‌లోని పలు చోట్ల ఉన్న ప్రమాదకరమైన బాంబులను గుర్తించి హీరోగా మారింది. ఇప్పటి వరకూ 90 పేలుడు పదార్థాలను గుర్తించింది. ఈ కుక్కకు సంబంధించిన ఓ వీడియోను స్టేట్ ఎమర్జెన్సీ సర్వీస్ ఆఫ్ ఉక్రెయిన్ ఫేస్‌బుక్‌‌లో పోస్ట్ చేశారు. ఈ పోస్ట్‌లో పాట్రన్ గురించి వివరాలను తెలియజేశారు. "మా మిలిటెంట్ డాగ్ యుద్ధంలో తన సేవలను అందిస్తుంది. యుద్ధం ప్రారంభమైనప్పటి నుంచి దాదాపు 90 పేలుడు పదార్థాలను గుర్తించింది. మా మిత్రమా అలుపురాని నీ పనికి ధన్యవాదాలు" అంటూ వీడియోలో చెప్పుకొచ్చారు.

బాంబులను, ల్యాండ్‌మైన్స్‌ను గుర్తించి పాట్రన్ ఎంతోమంది ప్రాణాలను కాపాడింది. యుద్ధంలో తనదైన సేవలు అందిస్తున్న పాటర్న్‌ చాలా ప్రజాదరణ పొందింది. సోషల్ మీడియాలో కూడా పాపులర్ అయిపోయింది. ఈ కుక్క గురించి తెలిసుకున్న నెటిజన్లు మిరాకిల్ అంటూ కామెంట్లు పెడుతున్నారు. దానిని జాగ్రత్తగా చూసుకోమని సలహాలు కూడా ఇస్తున్నారు. ఇది జాక్ రస్సెల్ టెర్రియర్ జాతికి చెందిన కుక్క పాటర్న్. ఈ జాతి కుక్కలను 200 ఏళ్ల క్రితం ఇంగ్లాండ్‌లో నక్కలను వేటాడేందుకు అభివృద్ధి చేశారు. వీటిని పార్సన్ రస్సెల్ టెర్రియర్ జాతి కుక్కలని కూడా అంటారు. ఈ జాతి కుక్కలకు చాలా ఇండిపెండెంట్‌గా.. చాలా తెలివైనవిగా వ్యవహరిస్తాయి. వీటికి శిక్షణ ఇవ్వడం చాలా సులభం.

అయితే చాలా దేశాల్లో కుక్కలకు ప్రత్యేక ట్రైనింగ్‌లు ఇస్తుంటారు. అలాంటి వాటిని వివిధ రకాలైన పనులు చేయిస్తుంటారు. పోలీసు బలగాలు కుక్కలకు శిక్షణ ఇచ్చి.. వాటి ద్వారా నేరస్థులను పట్టుకోవడానికి ఉపయోగిస్తుంటారు. దీనికోసం కొన్ని ప్రత్యేక జాతికి చెందిన కుక్కలను ఎంచుకుంటారు.