నాటుసారా విక్రయిస్తున్న ఇరువురు వ్యక్తులు అరెస్ట్
Andhra Pradesh Telugu | Suryaa Desk | Published : Thu, Apr 21, 2022, 12:21 PM
ఘంటసాల మండలం పాపవినాశనం గ్రామంలో నాటుసారా అమ్ముతున్న ప్రసాద్ అనే వ్యక్తిని అదుపులోకి తీసుకుని అతని వద్ద నుంచి ఐదు లీటర్ల నాటుసారాను స్వాధీనం చేసుకోవడం జరిగిందని ఘంటసాల ఎస్ఐ ఎన్. లక్ష్మినరసింహమూర్తి తెలిపారు. నాటుసారాను ఎక్కడినుంచి తీసుకుని వచ్చావని ఆరా తీసి గుంటూరు జిల్లా రాయలంక గ్రామం నుంచి లంకె రమేష్ అనే వ్యక్తి వద్దనుంచి తెస్తున్నట్లుగా తెలుపగా, అతనిని అదుపులోకి తీసుకుని అతని వద్ద మూడు లీటర్ల నాటుసారా, నాటు సారా తయారీకి ఉపయోగించే బట్టి సామాను స్వాధీనపరచుకున్నామని ఎస్ఐ తెలిపారు.
ఇరువురిపై కేసు నమోదు చేసి రిమాండ్ కు తరలించడం జరుగుతుందని, కృష్ణాజిల్లా ఎస్పీ సిద్ధార్థ కౌశల్ ఐపీఎస్ ఆదేశాల మేరకు అవనిగడ్డ డి ఎస్ పి మహబూబ్ భాషా పర్యవేక్షణలో, చల్లపల్లి సీఐ ఆధ్వర్యంలో ఈ దాడులు నిర్వహించినట్లు తెలిపారు. మండలంలో ఎక్కడైనా నాటుసారా అమ్మడం గాని, తయారు చేయడం గాని జరిగినట్లయితే చట్టపరంగా కఠిన చర్యలు తీసుకోవటం జరుగుతుందని హెచ్చరించారు. ఈ తనిఖీలలో పోలీసు సిబ్బంది పాల్గొన్నారు.
|
|