నియంత్రణలోనికి రాని పరిస్థితులు...శ్రీలంకలో మళ్లీ ఎమర్జెన్సీ

శ్రీలంక దేశంలో చెయిదాటిన పరిస్థితులు నియంత్రణలోకి మాత్రం రావడంలేదు. దీంతో శ్రీలంకలో మరోసారి ఎమర్జెన్సీ విధించారు. ఆ దేశ ప్రభుత్వానికి వ్యతిరేకంగా సాగుతున్న ఆందోళన మరింత ఉధృతమైంది. ఈ క్రమంలో అధ్యక్షుడు గోటబయ రాజపక్ష ఎమర్జెన్సీని విధిస్తున్నట్టు ప్రకటించారు. దేశంలో తీవ్ర ఆర్థిక సంక్షోభం కారణంగా అధ్యక్షుడు రాజీనామా చేయాలని డిమాండ్ చేస్తూ కార్మిక , విద్యార్థి సంఘాలు శుక్రవారం దేశవ్యాప్త సమ్మెను చేపట్టాయి. ఇందులో భాగంగా పార్లమెంట్‌ను ముట్టడించేందుకు ఆందోళనకారులు ప్రయత్నించారు. దీంతో పోలీసులు వారిని అడ్డుకున్నారు.

నిరసనకారులపై పోలీసులు టియర్ గ్యాస్, వాటర్ గన్స్‌ను ప్రయోగించారు. అయినా వారిని నిలవరించడం పోలీసులకు కష్టమైంది. ఆర్థిక సంక్షోభాన్ని ఎదుర్కోవడంలో ప్రభుత్వం విఫలమైందని రాజపక్సే ప్రభుత్వాన్ని దిగిపోవాలని అక్కడి ప్రజలు డిమాండ్ చేస్తున్నారు. ఈ మేరకు దేశంలోని లక్షలాది మంది కార్మికులు విధులు బహిష్కరించారు. ఒక్కటి తప్ప మిగిలిన అన్ని రైలు సర్వీసులు రద్దు చేయబడ్డాయి. చాలా బస్సులు రోడ్లు ఎక్కలేదు. కార్మికులు తమ ఫ్యాక్టరీల్లో ప్రదర్శనలు చేశారు. దేశవ్యాప్తంగా నల్ల జెండాలు వేలాడదీశారు.

కొన్ని నెలలుగా అక్కడ ఆహారం, ఇంధన, ఔషధాల కొరత ఉంది. దీంతో నిత్యావసరాల వస్తువులు ఆకాశాన్నంటాయి. ఫలితంగా 22 మిలియన్ల మంది ప్రజలు ఇబ్బంది పడుతున్నారు. దాంతో సామాన్య ప్రజలు ప్రభుత్వానికి వ్యతిరేకంగా గళం విప్పారు. దేశ ఆర్థిక వ్యవస్థ చాలా అస్తవ్యస్థం కావడానికి అధ్యక్షుడి విధాన తప్పిదాలే కారణమని మండిపడ్డారు. దీంతో శ్రీలంక రాజధాని కొలంబోలో ఎప్పటి నుంచో నిరసనలు వ్యక్తం చేస్తున్నారు. ప్రభుత్వాన్ని తక్షణం దిగిపోవాలని డిమాండ్ చేస్తున్నారు. ప్రజాగ్రహాన్ని గుర్తించిన ప్రతిపక్షాలు సైతం ప్రభుత్వానికి వ్యతిరేకంగా పావులు కదుపుతున్నాయి. ప్రభుత్వంపై అభిశంసన తీర్మానాన్ని ప్రవేశపెట్టింది.

స్వతంత్రం వచ్చిన ఇన్నాళ్లకు శ్రీలంక దారుణమైన సంక్షోభాన్ని ఎదుర్కొంటుంది. ప్రభుత్వం చేసిన అప్పులు, కోవిడ్, లాక్‌డౌన్ వంటి పరిణామాలతో శ్రీలంక ఆదాయానికి గండి పడింది. దాంతో విదేశీ కరెన్సీ నిల్వలు తరిగి.. తీవ్రమైసన ఆర్థిక సంక్షోభం నెలకొంది. దీంతో ప్రజల్లో ఆగ్రహ జ్వాలలు రగులుతున్నాయి. ఈ నేపథ్యంలో మొదటిసారి ప్రభుత్వం ఏప్రిల్ ఒకటో తేదీన ఎమర్జెన్సీ విధించింది. తర్వాత ఐదు రోజుల్లోనే ఉపసంహరించుకుంది. మళ్లీ ఇప్పుడు ఎమర్జెన్సీ ప్రకటించింది.