ఉత్తర కొరియాలో తాలిబాన్ తరహా నిబంధనలు

మహిళలపై కఠిన నిబంధనల విషయం వస్తే తాలిబాన్ లే గుర్తుకొస్తారు. తాజాగా ఆ జాబితాలో ఉత్తరకొరియా కూడా వచ్చింది. ఉత్తర కొరియా అధ్యక్షుడు కిమ్ అంటే తెలియని వారుండరు. కిమ్‌ జోంగ్ ఉన్‌ తీసుకునే నిర్ణయాలు ఎంత కఠినంగా, ఎంత విచిత్రంగా ఉంటాయో అందరికీ తెలిసిందే. చిన్న తప్పు చేసినా దారుణమైన శిక్షలు ఉంటాయి. ఇప్పుడు ఆ దేశంలో మహిళలు, యువత వేషధారణపై కూడా కఠినమైన ఆంక్షలు అమలవుతున్నాయి. 20 ఏళ్ల నుంచి 30 ఏళ్ల మధ్య గల మహిళలు, యువత వేషధారణపై నిబంధనల్ని అమలు చేస్తున్నట్టు స్థానిక మీడియా వెల్లడించింది.

ఉత్తర కొరియాలో టైట్ జీన్స్ వేసుకోవడం, హెయిర్‌కు రంగులు, అసభ్యకరమైన రాతలతో ఉండే దుస్తులు ధరించడం లాంటి వాటిపై అధికారులు కఠిన చర్యలు తీసుకుంటున్నారు. అలాంటి దుస్తులు వేసుకుని ఎవరైనా రోడ్లపై కనిపిస్తే వారిని పెట్రోలింగ్ అధికారులు పోలీస్ స్టేషన్‌కు తరలిస్తున్నారు. ఇంకెప్పుడు అలాంటివి వేసుకోమని రాతపూర్వకంగా హామీని తీసుకుని విడిచిపెడుతున్నారు. ఇంకా నిబంధనలు ఉల్లంఘించే వారి పేర్లు, చిరునామాలను బహిరంగంగా లౌడ్‌స్పీకర్లలో వెల్లడిస్తున్నారు.

నిజానికి అక్కడ గత ఏడాది మేలో టైట్ జీన్స్ వేసుకోవడం, హెయిర్ స్టైల్స్‌‌పై నిషేధం విధించారు. అలాంటి వేషధారణ ప్రమాదకరమైన విషం అంటూ ఆ దేశ అధ్యక్షుడు కిమ్ జోంగ్ ఉన్ అభివర్ణించారు. దాంతో అక్కడి అధికారులు ఆంక్షలను కచ్చితంగా అమలు చేస్తున్నారు. పైగా ప్రభుత్వ ఆధ్వర్యంలో నడిచే యూత్ లీగ్ విద్యార్థులకు మీటింగ్‌లు నిర్వహించి.. ప్రచారం కూడా చేస్తున్నారు. విదేశీ సంస్కృతిని వీడాలని చెబుతున్నారు. అయితే ఎంత అవగాహన కల్పించినా, నిబంధనలను ఎంత సీరియస్‌గా అమలు చేస్తున్నా..యువతీ యువకులు విదేశీ సినిమాలు చూడడం, దుస్తులు ధరించడంలో మార్పులు రావడం లేదని అక్కడి అధికారులు అంటున్నారు.