యాక్సిడెంట్ బినిఫిట్ లో ఎల్ఐసీ కొత్త పాలసీ

మనకు అనేక యాక్సిడెంటల్ పాలసీలున్నా...ఎల్ఐసీపై ఉన్న నమ్మమే వేరు. ఈ నేపథ్యంలో దేశీ దిగ్గజ బీమా రంగ కంపెనీ లైఫ్ ఇన్సూరెన్స్ కార్పొరేషన్ ఆఫ్ ఇండియా తాజాగా కొత్త పాలసీ తీసుకువచ్చింది. దీని పేరు గ్రూప్ యాక్సిడెంట్ బెనిఫిట్స్ రైడర్. స్టాక్ ఎక్చ్సేంజీలకు ఎల్‌ఐసీ ఈ విషయాన్ని తెలియజేసింది. ఎల్‌ఐసీ యాక్సిడెంట్ బెనిఫిట్ రైడర్ పాలసీ అనేది నాన్ లింక్డ్, నాన్ పార్టిసిపేటింగ్, గ్రూప్ హెల్త్ రైడర్ ప్లాన్. ఎల్‌ఐసీ స్టాక్ మార్కెట్‌లో లిస్ట్ అయిన తర్వాత తీసుకువస్తున్న రెండో పాలసీ ఇది. ఇటీవలనే ఎల్‌ఐసీ సంస్థ బీమా రత్న పేరుతో కొత్త లైఫ్ ఇన్సూరెన్స్ పాలసీని తీసుకువచ్చిన విషయం తెలిసిందే.

ఎల్‌ఐసీ షేర్లు మే 17న స్టాక్ మార్కెట్‌లో లిస్ట్ అయ్యాయి. ఈ షేరు రూ. 872 వద్ద లిస్ట్ అయ్యింది. ఎల్ఐసీ ఇష్యూ ప్రైస్ రూ. 949గా ఉంది. జూన్ 3న ఎల్‌ఐసీ షేరు ధర రూ. 802 వద్ద ట్రేడ్ అయ్యింది. 0.48 శాతం పడిపోయింది. దీని వల్ల ఎల్ఐసీ ఐపీవోలో షేర్లు కొనుగోలు చేసిన వారికి భారీ నష్టాలు మిగిలాయని చెప్పుకోవచ్చు. ఎందుకంటే షేరు ధర పడిపోతూనే వస్తోంది.

ఎల్ఐసీ మే 30 కంపెనీ ఆర్థిక ఫలితాలను వెల్లడించింది. వీటి ప్రకారం చూస్తే.. మార్చి త్రైమాసికంలో ఎల్‌ఐసీ నికర లాభం 17.41 శాతం పడిపోయింది. రూ. 2409.39 కోట్లుగా నమోదు అయ్యింది. కంపెనీ నికర లాభం గత ఆర్థిక సంవత్సరం ఇదే త్రైమాసికంలో రూ. 2917.33 కోట్లుగా ఉండేది. మరోవైపు ఎల్‌ఐసీ ఇన్వెస్టర్లకు డివిడెంట్ కూడా ప్రకటించింది. ఒక్కో షేరుకు రూ. 1.5 మేర డివిడెంట్ లభించనుంది. కంపెనీ మార్కెట్లో్ లిస్ట్ అయిన తర్వాత వెల్లడి అయిన తొలి ఆర్థిక ఫలితాలు ఇవే కావడం గమనార్హం.

ఇన్వెస్టర్లను ఎల్‌ఐసీ స్టాక్స్ నిరాశకు గురిచేశాయి. కంపెనీ స్టాక్ కనిష్ట స్థాయిలో కదలాడుతోంది. ఈ షేరు ధర రూ. 802 వద్ద ముగిసింది. మార్కెట్‌లో ఎల్‌ఐసీ స్టాక్ లిస్టింగ్ రోజున సంస్థ మార్కెట్ క్యాప్ రూ. 5.68 లక్షల కోట్లుగా ఉండేది. ఇప్పుడు ఈ మార్కెట్ క్యాప్ రూ. 60 వేల కోట్లకు పైగా హరించుకుపోయింది. రూ. 5.07 లక్షల కోట్లకు తగ్గింది. కేంద్ర ప్రభుత్వానికి ఎల్‌ఐసీ ఐపీవో ద్వారా రూ. 20 వేల కోట్లకు పైగా లభించాయి. ఎల్‌ఐసీ ఐపీవోకు డొమెస్టిక్ ఇన్వెస్టర్ల నుంచి మంచి ఆదరణ లభించింది. అయితే ఎల్‌ఐసీ ఐపీవో మాత్రం ఆకట్టుకోలేకపోయింది. డబ్బులు పెట్టిన వారు నష్టాల్లోనే ఉన్నారు.