మంకీ ఫ్యాక్స్ అంతంపై గళం మార్చిన డబ్ల్యూహెచ్ఓ

కరోనా వైరస్ గురించి ప్రజలు ఇంకా  మర్చిపోకముందే  మంకీ ఫ్యాక్స్  నేడు ప్రపంచానికి సవాల్ విసురుతోంది. మంకీపాక్స్ వ్యాప్తి పరిస్థితిని సమిష్టిగా అరికట్టడానికి ప్రపంచానికి ఓ అవకాశం ఉందని గతంలో డబ్లూహెచ్ఓ చెప్పింది. తాజాగా, డబ్ల్యూహెచ్ఓ ఐరోపా విభాగం చీఫ్ డాక్టర్ హన్స్ క్లూగే మాట్లాడుతూ.. మంకీపాక్స్ వ్యాప్తిని పూర్తిగా నియంత్రించగలమో లేదో మాకు ఇంకా తెలియదని వ్యాఖ్యానించారు. ఈ వైరస్‌ నియంత్రణకు కోవిడ్-శైలి పరిమితుల స్థాయిని అనుకరించనప్పటికీ ముప్పును తగ్గించడానికి ఆరోగ్య అధికారులు అత్యవసర చర్య తీసుకోవాల్సిన అవసరం ఉందని ఆయన అన్నారు.

గత రెండున్నరేళ్లుగా కరోనా మహమ్మారితో అతలాకుతలమవుతున్న ప్రపంచానికి మంకీపాక్స్ రూపంలో మరో ముప్పు పొంచి ఉందనే సంకేతాలు వెలువడుతున్నాయి. ఒకప్పుడు ఆఫ్రికా దేశాలకే పరిమితమైన ఈ వైరస్ ప్రస్తుతం 30కిపైగా దేశాలకు వ్యాపించింది. ఇప్పటివరకూ 550 కేసులు ధ్రువీకరించగా.. అనుమానిత కేసులు కూడా వందల్లో ఉన్నాయి. అయితే, మంకీపాక్స్‌ వ్యాప్తిని కట్టడి చేయవచ్చని తొలుత ప్రకటించిన ప్రపంచ ఆరోగ్య సంస్థ తాజాగా యూటర్న్ తీసుకుంది. ఈ వైరస్‌ను అదుపు చేయడం గురించి ఖచ్చితంగా తెలియదని ప్రకటించింది.

క్లూగే ప్రకారం మంకీపాక్స్‌కు ఐరోపా అతిపెద్ద ఎపిక్ సెంటర్‌గా మారింది. పశ్చిమ, మధ్య ఆఫ్రికాలోని స్థానిక ప్రాంతాల వెలుపల మంకీపాక్స్ వ్యాప్తి చెందిన దాఖలాల్లేవు. గత రెండు వారాలుగా పలు దేశాలు ముఖ్యంగా యూరప్‌లో వేగంగా సంక్రమిస్తోంది. ‘‘వేగంగా అభివృద్ధి చెందుతున్న ఈ పరిస్థితిని తక్షణమే పరిశోధించడానికి, నియంత్రించడానికి కలిసి పనిచేసే అవకాశం క్లిష్టంగా ఉంది’’ అని క్లూగే అన్నారు.

ఈ వైరస్ లైంగిక కార్యకలాపాలు ముఖ్యంగా స్వలింగ సంపర్కుల్లో ఎక్కువగా వ్యాప్తిచెందుతున్నట్టు నివేదికలు అందుతున్నాయి. అయితే, అన్ని కేసులకూ ఇదే కారణం కాదని నిపుణులు అంటున్నారు. ‘‘మంకీపాక్స్ వైరస్ ఒక వ్యక్తి నుంచి మరొకరికి వీర్యం లేదా యోని ద్రవాల ద్వారా కూడా వ్యాప్తి చెందుతుందా అనేది ఇంకా స్పష్టంగా తెలియలేదు.. ఈ ద్రవాలలో వైరస్ ఎక్కువ కాలం ఉండగలదా? అనే దానిపై కూడా స్పష్టత లేదు’’ అని క్లూగే పేర్కొన్నారు.

యూకేలో మొదటి కేసును మే 7న గుర్తించారు. అయితే, ఏప్రిల్ మధ్య నుంచే వ్యాప్తి మొదలయ్యిందే సంకేతాలు వెలువడుతున్నాయి. రోజూ కొత్త కేసులు నమోదవుతున్నాయి. ఇప్పటి వరకూ 180కిపైగా కేసులు బయటపడ్డాయి. దీంతో ఇది కమ్యూనిటీ ట్రాన్సిమిషన్‌లోకి వెళ్లినట్టు సంకేతాలు వెలువడుతున్నాయి. ఇంగ్లండ్‌లో ఒకరి నుంచి మరొకరికి వ్యాపిస్తున్నట్లు కనిపిస్తోందని యూకే హెల్త్ సెక్యూరిటీ ఏజెన్సీ(యూకేహెచ్ఎస్ఏ) రెండు రోజుల కిందట ప్రకటించింది.

‘‘ప్రస్తుతం మంకీపాక్స్ వైరస్ వ్యాప్తి ఇంగ్లాండ్‌లో వ్యక్తి నుంచి వ్యక్తికి వ్యాపించడం ఇదే మొదటిసారి.. ఈ వైరస్ బారినపడ్డ బాధితుల్లో ఆఫ్రికాకు ప్రయాణించిన ట్రావెల్ హిస్టరీ లేదు’’ అని ఏజెన్సీ తెలిపింది. యూకేహెచ్ఎస్ఏ ప్రకారం బ్రిటన్‌లోని మెజార్టీ కేసులు లండన్‌లో ఉన్నాయి.. వీరిలో ఎక్కువ మంది స్వలింగ, బై సెక్సువల్స్.. మహిళల్లో కేవలం రెండు కేసులు మాత్రమే ఉన్నాయి.