మోసం చేశాడని..వెంటాడి..వెంటాడి చంపింది

ఎవరినైనా వెంటాడి...వెంటాడి చంపడం మనం  చాలా అరుదుగా వింటుంటాం. కానీ  కోపం ఎంతటి పనినైనా చేయిస్తుంది. తాజాగా తనను మోసం చేశాడని ఓ యువతి ప్రియుడ్ని అత్యాధునిక సాంకేతికత సాయంతో వెంబడించి అతి కిరాతకంగా హత్య చేసింది. ఈ ఘటన అమెరికాలోని ఇండియానాపొలిస్‌‌లో చోటుచేసుకుంది. గైలిన్ మోరిస్ అనే యువతి.. ఆండ్రే స్మిత్ అనే యువకుడ్ని ప్రేమించింది. అయితే, అతడు కొద్దికాలం నుంచి మరో అమ్మాయితో చెట్టాపట్టాలేసుకుని తిరుగుతూ ఆమెకు ముఖం చాటేశాడు. దీంతో అతడు తనను మోసం చేస్తున్నాడని భావించి ప్రియుడిపై ఆగ్రహంతో రగిలిపోయింది. చివరకు అతడ్ని అంతం చేయాలని నిర్ణయించుకుంది. అతడిపై నిఘా పెట్టి పక్కా ప్లాన్ ప్రకారం ప్రాణాలు తీసింది.

అనుకున్న ప్రకారం ప్రియుడు స్మిత్‌కు తెలియకుండా అతడి వినియోగించే వస్తువులపై ఓ ఆపిల్ ఎయిర్ టాగ్ (చిన్న బటన్ వంటి పరికరం) ఫిక్స్ చేసింది. బగ్ సాయంతో అతడి కదలికలు ఆమెకి ఎప్పటికప్పుడు తెలిసిపోయేవి. ఈ క్రమంలో ఆండ్రే స్మిత్ టిల్లీస్ పబ్‌లో ఉన్నాడని ఆపిల్ ఎయిర్ టాగ్ డేటా ద్వారా గుర్తించిన గైలిన్.. ఆగ్రహంతో ఊగిపోతూ అక్కడికి వెళ్లింది. మరో మహిళ, అతడు అక్కడ కంటబడటంతో పట్టరాని ఆవేశం ఆమెలో కట్టలు తెంచుకుంది. వెంటనే అక్కడ ఉన్న ఖాళీ వైన్ బాటిల్‌ను తీసుకుని మహిళపై దాడికి ప్రయత్నించింది. దీనిని స్మిత్ అడ్డుకున్నాడు.

అయినాసరే గైరే వెనక్కు తగ్గకుండా ప్రియుడితో ఘర్షణకు దిగింది. కానీ, పబ్‌ సిబ్బంది జోక్యం చేసుకుని, ముగ్గుర్నీ అక్కడి నుంచి వెళ్లిపోవాలని స్పష్టం చేశారు. ఆ తర్వాత పబ్ నుంచి స్మిత్ బయటకు రావడంతో అక్కడే తన కారుతో అతడ్ని ఢీకొట్టి చంపేసింది. ప్రత్యక్ష సాక్షుల కథనం మేరకు పోలీసుల గైలిన్ మోరిస్ ను అరెస్ట్ చేశారు. పబ్ కావడం వల్ల అర్ధరాత్రి జరిగిన ఈ ఘటనను అడ్డుకోడానికి ఎవరూ ముందుకురాలేదని ఇండియానా మెట్రోపాలిటిన్ పోలీస్ విభాగం చీఫ్ డాన్ వైయిల్హర్ తెలిపారు.

ప్రత్యక్ష సాక్షుల కథనం ప్రకారం.. పబ్ నుంచి స్మిత్ బయటకు వచ్చిన తర్వాత కారుతో ఒక్కసారిగా ఢీకొట్టింది. అతడు కింద పడిపోవడంతో వెనక్కి వెళ్లి మళ్లీ వేగంగా వచ్చి తొక్కించింది. మూడుసార్లు అతడ్ని కారుతో ఢీకొట్టిందని తెలిపారు. తర్వాత కారు నుంచి దిగి, ప్రియుడు వెంట వచ్చిన మహిళను కూడా చంపడానికి ప్రయత్నించింది. అయితే, అక్కడ ఫుడ్ ఆర్డర్ ఇచ్చిన ఆమె బయటకు రావడానికి ఆలస్యమైంది. ఈ సమయానికి పోలీసులు సంఘటనా స్థలానికి చేరుకున్నారు.

గైలిన్ ఉపయోగించిన ఆపిల్ ఎయిర్ టాగ్ జీపీఎస్ మాదిరిగానే పనిచేస్తుంది. దీన్ని ఆపిల్ ఫోన్, ఐపాడ్ వంటి వాటి ద్వారా నియంత్రించవచ్చు. ఈ ఎయిర్ టాగ్‌ను ఏదైనా వస్తువుకు అనుసంధానం చేస్తే అవి ఎక్కడున్నా ఇట్టే సులభంగా తెలుసుకోవచ్చు. ‘ఫైండ్ మై’ అనే యాప్‌లో సదరు ఎయిర్ టాగ్ డేటా గుర్తించవచ్చు. గైలిన్ కూడా ప్రియుడిపై అనుమానంతో ఈ ఎత్తుగడనే ఉపయోగించింది. ఎయిర్ టాగ్ కచ్చితంగా అతడిని పట్టివ్వడంతో పట్టరాని ఆగ్రహంతో అతడిని కారుతో కసిగా మూడుసార్లు తొక్కించేసి చంపేసింది.