చర్చిలో ఉగ్రదాడులు..ఏకంగా వందమంది నైజేరియన్లు హతం

ఉగ్రవాదానికి మతం, జాతి, ప్రాంత, తన, మన తేడా ఉండుదు. అదో ఉన్మాదంతో ముందుకెళ్తోంది. తాజాగా పశ్చిమ ఆఫ్రికా దేశం నైజీరియాలో ఉగ్రవాదులు మరోసారి మారణహోమానికి తెగబడ్డారు. నైజీరియా నైరుతి ప్రాంతంలోని చర్చిలో విచక్షణారహితంగా కాల్పులు జరుపుతూ బాంబు దాడులకు పాల్పడ్డారు. ఒండో రాష్ట్రం ఓవో నగరంలోని క్యాథలిక్ చర్చిలో జరిగిన ఈ దారుణ ఘటనలో డజన్ల కొద్దీ ప్రజలు ప్రాణాలు కోల్పోయినట్టు అధికారులు తెలిపారు. వీరిలో చిన్నారులు కూడా ఉన్నట్టు పేర్కొన్నారు. ఆదివారం కావడంతో సెయింట్‌ ఫ్రాన్సిస్‌ క్యాథలిక్‌ చర్చికి పెద్ద సంఖ్యలో క్రైస్తవులు ప్రార్థనల కోసం వచ్చిన సమయంలో ఈ ముష్కర మూకలు దాడిచేసి చర్చి ప్రధాన పాస్టర్‌ను అపహరించారు.

తర్వాత విచక్షణారహితంగా కాల్పులు జరిపినట్టు ప్రత్యక్ష సాక్షులు వెల్లడించారు. ఈ ఘటనలో 70 నుంచి 100 మంది వరకూ ప్రాణాలు కోల్పోయినట్టు స్థానిక నేతటిమిలెయిన్‌ పేర్కొన్నారు. అయితే మృతుల సంఖ్య ఇంకా పెరిగే అవకాశం ఉందని అధికారులు తెలిపారు. రక్తపు మడుగులో పడిఉన్న మృతదేహాలతో చర్చిలో భయానక వాతావరణం నెలకుంది. నైజీరియాలో ఇటీవల జరిగిన అత్యంత భయానక ఉగ్రదాడి ఇదే కావడం గమనార్హం. పోలీసుల కథనం ప్రకారం.. ఆయుధాలు ధరించిన నలుగురు ముష్కరులు ఈ దాడిలో పాల్గొన్నట్టు తెలిపారు.

ఒండో రాష్ట్రంలో ఇటీవల సంవత్సరాల్లో జరిగిన తొలి ఉగ్రదాడి ఇదే. ఈ ఘటనపై నైజీరియా అధ్యక్షుడు తీవ్ర దిగ్భ్రాంతి వ్యక్తం చేశారు. ఉగ్రదాడిని ఖండించిన ముహ్మద్ బుహారీ.. రక్తపాతాన్ని అంతం చేస్తామని వాగ్దానం చేశారు. కాగా, ఈ దాడికి బాధ్యత వహిస్తూ ఇప్పటి వరకూ ఏ ఉగ్రవాద సంస్థా ప్రకటన చేయలేదు. వాస్తవానికి ఉత్తర నైజీరియాలోని చర్చలపై దాడులు సర్వసాధారణంగా జరుగుతాయి. కానీ 2015లో బోకో హరామ్ తిరుగుబాటు ఉచ్ఛస్థితిలో ఉన్నప్పటి కంటే తక్కువ. ఆదివారం నాడు దాడి జరిగిన నైరుతి నైజీరియాలో పశువుల కాపర్ల ద్వారా కిడ్నాప్‌ చోటుచేసుకుంది.

ఓవో ప్రాంతానికి ప్రాతినిధ్యం వహిస్తున్న ఫెడరల్ చట్టసభ సభ్యుడు డెలెగ్బే టిమిలీన్ అసోసియేటెడ్ ప్రెస్‌తో మాట్లాడుతూ కనీసం 50 మంది మరణించారని చెప్పారు. అనధికారికంగా లెక్కల ప్రకారం 100 మంది చనిపోయినట్టు తెలుస్తోంది. వంద మందికిపైగా గాయపడినట్టు అధికారులు తెలిపారు. దాడి తర్వాత ఆ ప్రాంతమంతా హాహాకారాలు, ఆర్తనాదాలతో నిండిపోయింది. నైజీరియాలో సామాజిక, ఆర్థిక ఉద్రిక్తతల నేపథ్యంలో ఈ దాడి జరిగింది. అక్కడ వచ్చే ఏడాది ఫిబ్రవరిలో అధ్యక్ష ఎన్నికలు జరగనుండగా దానికి ముందు జరుగుతున్న హత్యలు, కిడ్నాప్‌లు ప్రభుత్వంపై తీవ్ర ఆగ్రహాన్ని పెంచుతున్నాయి.