కీవవ్ నగరంపై మరోమారు బీకర దాడులు

ఉక్రెయిన్  పై  ఆధిపత్యం కోసం రష్యా  పట్టువిడవకుండా దాడులకు దిగుతోంది. దీంతో  ఉక్రెయిన్ రాజధాని కీవ్ నగరంపై మరోసారి రష్యా భీకర దాడులకు తెగబడింది. పశ్చిమ దేశాల నుంచి ఉక్రెయిన్‌కు అందుతున్న యుద్ధ సామాగ్రి, ఇతర ఆయుధాలే లక్ష్యంగా మాస్కో సేనలు విరుచుకుపడ్డాయి. తమ దాడుల్లో పాశ్చత్య దేశాలు అందజేసిన ఆయుధాలు ధ్వంసమయ్యాయని రష్యా ఓ ప్రకటనలో తెలిపింది. అంతేకాదు, దీర్ఘశ్రేణి రాకెట్ వ్యవస్థలను ఉక్రెయిన్‌కు అందజేస్తే ఇప్పటి వరకూ తాము దాడిచేయని కొత్త లక్ష్యాలను ఎంపిక చేసుకోవాల్సి ఉంటుందని పరోక్షంగా అమెరికాను రష్యా అధ్యక్షుడు వ్లాదిమిర్ పుతిన్ హెచ్చరించారు.

ఇదిలావుంటే  ఉక్రెయిన్‌కు రాకెట్ వ్యవస్థలను అందజేస్తామని అమెరికా ప్రకటించిన నేపథ్యంలో కీవ్‌పై రష్యా సైన్యలు మెరుపుదాడులు చేయడం గమనార్హం. ఏప్రిల్‌ 28న ఐక్యరాజ్యసమితి సెక్రటరీ జనరల్‌ ఆంటోనియో గుటెర్రస్‌ కీవ్‌లో పర్యటించిన సమయంలోనూ రష్యా క్షిపణులను ప్రయోగించింది. ఇవి ఐరాస సిబ్బందికి సమీపంగా దూసుకెళ్లాయి. ఆ తర్వాత నుంచి పూర్తిగా ఉక్రెయిన్ తూర్పు ప్రాంతంపైనే దృష్టి సారించింది. కానీ, దాదాపు 50 రోజుల తర్వాత ఆదివారం తెల్లవారుజామున మళ్లీ ఊహించని విధంగా దాడికి దిగింది.

అదనపు ఆయుధాలను అందజేయడం ద్వారా యుద్ధాన్ని ఎక్కువ రోజులు సాగదీయడానికి కొన్ని దేశాలు చూస్తున్నాయని పుతిన్ ధ్వజమెత్తారు. ఆదివారం రష్యా క్రూయిజ్ క్షిపణులతో కీవ్‌పై బాంబుల వర్షం కురిపించింది. పివ్‌డెనౌక్రెయిన్స్క్‌ అణు కర్మాగారానికి చేరువగా ఒక క్రూయిజ్‌ క్షిపణి దూసుకెళ్లిందని, అది నేరుగా పడుంటే ఊహకందని విపత్తు సంభవించి ఉండేదని కర్మాగార నిర్వహణ సంస్థ ఎనెర్జోటమ్‌ ఆందోళన చెందింది. ప్రస్తుతం పనిచేస్తున్న అణు కర్మాగారంపై రాకెట్లు పడితే రేడియేషన్ విడుదలై, తర్వాత ఎదురయ్యే పరిణామాలను రష్యా అర్థం చేసుకోవడం లేదని ఆవేదన వ్యక్తం చేసింది.

ఉక్రెయిన్‌కు పశ్చిమ దేశాలు అందించిన టీ-72 యుద్ధట్యాంకులు సహా ఇతర ఆయుధాలను క్షిపణులతో ధ్వంసం చేసినట్లు రష్యా వెల్లడించింది. కాస్పియన్‌ సముద్రం నుంచి రష్యా ప్రయోగించిన ఐదు క్రూయిజ్‌ క్షిపణుల్లో ఒకదానిని కూల్చివేశామని, మిగతా నాలుగు మాత్రం వివిధ భవనాలను ధ్వంసం చేశాయని ఉక్రెయిన్‌ జనరల్‌ స్టాఫ్‌ పేర్కొన్నారు. సీవీరోదొనెట్స్క్‌ ప్రాంతంలో ఉక్రెయిన్‌ ఎదురుదాడితో రష్యా దూకుడుకు అడ్డుకట్ట పడుతుందని యూకే సైన్యం తాజా అంచనాలు చెబుతున్నాయి.

అమెరికా ఆయుధాల అందజేతపై పుతిన్ స్పందించారు. ‘‘బహుళ రాకెట్‌ ప్రయోగ వ్యవస్థలను ఉక్రెయిన్‌కు అమెరికాకు అందజేసినా ఏ ప్రభావం ఉండదు. ఎందుకంటే ఉక్రెయిన్‌ వద్ద ఇప్పటికే అలాంటివి ఉన్నాయి.. నిల్వను భర్తీ చేసుకోడానికే తప్పా ఉపయోగం ఉండదు.. అయినా వినియోగించే రాకెట్‌ను బట్టి పరిధి ఉంటుందే గానీ దానిని ప్రయోగించే వ్యవస్థను బట్టి కాదు’’ అని వ్యాఖ్యానించారు.