ఆ చట్టంతోనైనా...గన్ కల్చర్ కు తెరపడేనా

అమెరికాలోని చికాగోలు మళ్లీ గన్ కల్చర్  చెలరేగింది. ఏకంగా ఆరుగురి ప్రాణాలను తీసుకొంది. ఇదిలావుంటే అమెరికాలో గన్‌కల్చర్‌ కట్టడి కోసం అక్కడి పార్లమెంట్‌లోని డెమొక్రటిక్, రిపబ్లికన్ పార్టీల సెనేటర్లు తుపాకీ హింస కట్టడి ప్రతిపాదనలపై ఓ అవగాహనకు వచ్చారు. కాల్పులను అరికట్టేందుకు కొన్ని ప్రతిపాదనలు రూపొందించారు.. సంబంధిత బిల్లుకు రిపబ్లికన్లను మద్దతు ఇచ్చినట్టు తెలుస్తుంది. ఇదే సందర్భంలో అక్కడ తుపాకులు మోత మోగడం గమనార్హం. ఈ నేపథ్యంలో అగ్రరాజ్యం తీసుకొచ్చే ఈ కొత్త చట్టం ఈ గన్  కల్చర్ ను ఎంతవరకు నియంత్రించగలదు అన్నది ప్రశ్నార్థకంగా మారుతోంది.

ఇక వివరాలలోకి వెళ్లితే.. ఇదిలావుంటే కాల్పుల మోతతో మరోసారి అగ్రరాజ్యం దద్దరిల్లింది. తాజాగా చికాగోలోని పలు ప్రాంతాల్లో కాల్పులు జరిగాయి. ఈ ఘటనలో ఆరుగురు మరణించగా... 20 మంది గాయపడ్డారు. శుక్రవారం నుంచి ఆదివారం వరకు వివిధ ప్రదేశాల్లో ఈ కాల్పులు జరిగినట్టు తెలుస్తుంది. ఈ కాల్పుల్లో కొంతమంది అక్కడికక్కడే ప్రాణాలు కోల్పోయారు. గేరి ప్రాంతంలో ఆదివారం అర్ధరాత్రి సమయంలో ఓ నైట్ క్లబ్‌లో కాల్పులు జరిగాయి. ఈ కాల్పుల్లో 26 ఏళ్ల యువకుడు, 34 ఏళ్ల మహిళ చనిపోయారు. వారిని ఆస్పత్రికి తరలించినప్పటికీ అప్పటికే చనిపోయినట్టు వైద్యులు నిర్ధారించారు.

సౌత్ జస్టిన్ 6800 బ్లాక్‌లో శుక్రవారం సాయంత్రం 5:02 గంటలకు కాల్పులు జరగ్గా.. 25 ఏళ్ల వ్యక్తి చనిపోయాడు. అలాగే వెస్ట్ 18వ వీధిలోని 400 బ్లాక్‌లో శుక్రవారం రాత్రి 11:05 గంటలకు 26 ఏళ్ల వ్యక్తి కాల్చి చంపబడ్డాడు. సౌత్ అల్బానీలోని 0-100 బ్లాక్‌లో శనివారం అర్ధరాత్రి 12:19 గంటలకు జరిగిన కాల్పుల్లో 37 ఏళ్ల మహిళ చనిపోయింది. వాహనంలో వెళ్తుండగా ఆమెపై గుర్తు తెలియని వ్యక్తులు కాల్పులు జరిపారు. దాంతో బాధితురాలి తల, శరీరానికి గాయాలయ్యాయి. పరిస్థితి విషమించడంతో స్ట్రోగర్ ఆస్పత్రికి తరలించారు. ఆ తర్వాత ఆమె చనిపోయిందని పోలీసులు తెలిపారు.

అలాగే శనివారం తెల్లవారుజామున సుమారు 2.27 గంటలకు సౌత్ ఇండియానాలోని 2800 బ్లాక్‌లో ఓ వాహనంలో వెళ్లే 34 ఏళ్ల వ్యక్తి తుపాకీ గాయాలతో కనిపించినట్టు పోలీసులు తెలిపారు. అతనిని చికాగో యూనివర్సిటీ మెడికల్ సెంటర్‌కు తీసుకెళ్లగా.. తీవ్ర గాయాల వల్ల అతను చనిపోయినట్టు వైద్యులు నిర్ధారించారు. అలాగే సౌత్ డామెన్‌లోని 8600 బ్లాక్‌లో శనివారం మధ్యాహ్నం 3:20 గంటలకు జరిగిన కాల్పుల్లో 23 ఏళ్ల యువకుడు మృతి చెందగా.. మరో ముగ్గురు గాయపడ్డారు. అదేవిధంగా అడ్వకేట్ క్రైస్ట్ మెడికల్ సెంటర్‌లో వాహనంలోని వ్యక్తి తుపాకీతో జరిగిన కాల్పుల్లో ఓ 23 ఏళ్ల వ్యక్తి చనిపోయాడు. అదే ప్రాంతంలో మరికొంతమందికి గాయాలయ్యాయి. వారిని పోలీసులు ఆస్పత్రికి తరలించారు. ఈ ఘటనలపై ఏరియా వన్ డిటెక్టివ్‌లు దర్యాప్తు చేస్తున్నారు. ఇప్పటి వరకు ఎవరినీ అరెస్ట్ చేయలేదు.