మళ్లీ కరోనా అలజడి...మహారాష్ట్రాను మరోసారి వణికించనున్నదా

దేశంలో కరోనా కేసులు పెరిగిపోతున్నాయి. కరోనా కేసులు పెరుగుదలను దృష్టిలో పెట్టుకుని ఇతర రాష్ట్రాల్లో కూడా వైద్యాధికారులు అప్రమత్తమయ్యారు. చండీగఢ్ అధికారులు సోమవారం ఓ హెల్త్ అడ్వైజరీని కూడా జారీ చేశారు. తాజాగా అక్కడ 46 కొత్త కోవిడ్ కేసులు నమోదయ్యాయి. దాదాపు 4 నెలల తర్వాత కేసులు పెరగడంతో.. అధికారులు చర్యలు తీసుకోవడానికి ఉపక్రమించారు. కరోనా జాగ్రత్తలు తీసుకోవాలని ప్రజలకు సూచించారు. భౌతిక దూరం పాటించాలని, మాస్క్‌లను ధరించాలని పేర్కొన్నారు. మరోవైపు సోమవారం కేంద్ర ఆరోగ్య శాఖ మంత్రి... రాష్ట్రాలు, కేంద్ర పాలిత ప్రాంతాల ఆరోగ్య మంత్రులు, అధికారులతో సమావేశం నిర్వహించారు. కరోనా కట్టడికి తప్పనిసరిగా జాగ్రత్తలు తీసుకోవాలని, ప్రతి ఒక్కరూ వ్యాక్సిన్‌ తీసుకునేలా చేయాలని సూచించారు.

కరోనా వైరస్ కోరలు చాచింది. మహారాష్ట్రలో కేసులు అమాంతం పెరిగాయి. పది రోజుల్లోనే 241 శాతం కేసులు పెరిగాయి. జూన్ మూడో తేదీన 5,127 కేసులు ఉండగా.. ఆ సంఖ్య ప్రస్తుతం 17 వేల 480కి పెరిగింది. ప్రస్తుతం మరణాల రేటు 1.86 శాతంగా ఉంది. దీంతో కరోనా వైరస్ మళ్లీ వేగం అందుకున్నట్టు అర్థమవుతుంది. ఈ ఏడాది మే నెలలో 9,354 కోవిడ్ కేసులు నమోదు కాగా అందులో ముంబై నుంచి 5,980 కేసులు ఉన్నట్టు మహారాష్ట్ర ఆరోగ్య శాఖ అధికారులు వెల్లడించారు. అంతేకాదు గత నెలలో కోవిడ్‌తో 17 మంది చనిపోయారు.

జూన్ ఒకటో తేదీ నుంచి 12వ తేదీ వరకు మహారాష్ట్రలో మొత్తం 23,941 పాజిటివ్ కేసులు నమోదు అయ్యాయి. ఇదే సమయంలో మొత్తం 12 మంది చ‌నిపోయారు. అయితే ఈ మధ్య కాలంలో కోవిడ్ బారిన పడుతున్న వారిలో స్వల్ప లక్షణాలే మాత్రమే ఉంటున్నాయి. పెద్దగా ఎవరూ ఆస్పత్రిలో జాయిన్ అయ్యే కేసులు తక్కువగా ఉంటున్నాయి. అయినా సరే ప్రజలు అప్రమత్తంగా ఉండాలని అధికారులు సూచిస్తున్నారు.