బ్రిటన్ లో భారతీయుడికి రేప్ కేసులో జైలు

ప్రతి దేశంలో అత్యాచారాలకు ఎన్ని చర్యలు తీసుకొంటున్న కామాంధుల తీరులో మాత్రం మార్పు రావడంలేదు. డేటింగ్ యాప్‌లో పరిచయమైన మహిళపై అత్యాచారం చేసినట్టు నిర్ధారణ కావడంతో భారత సంతతి వైద్యుడికి బ్రిటన్ కోర్టు నాలుగేళ్ల జైలు శిక్ష విధించింది. గత నెలలోనే వైద్యుడ్ని దోషిగా నిర్ధారించిన ఎడిన్‌బర్గ్ హైకోర్టు.. బుధవారం ఆయనకు శిక్షను ఖరారు చేసింది. భారత సంతతికి చెందిన మనేష్ గిల్ (39) టిండర్ డేటింగ్ యాప్‌లో మైక్ అనే పేరుతో బాధితురాలికి పరిచయమయ్యాడు. డిసెంబరు 2018లో స్టిర్లింగ్‌లోని ఓ హోటల్‌లో ఆమెను కలిసినప్పుడు అక్కడ అత్యాచారానికి పాల్పడినట్టు ఆరోపణలు ఎదుర్కొన్నారు. విచారణలో ఆయన నేరం చేసినట్టు రుజువయ్యింది. దీంతో కోర్టు అతడ్ని దోషిగా నిర్దారించి, జైలు శిక్ష వేసింది.

ఇదిలావుంటే ఈ కేసు విచారణలో బాధిత మహిళ తాను నర్సింగ్ విద్యార్థినని తెలిపింది. లైంగిక వేధింపులకు గురైనందున తాను ఎంత మానసిక వేదనను అనుభవిస్తున్నానో వివరించింది. ఎడిన్‌బర్గ్‌లో కుటుంబంతో కలిసి ఉండే మనేశ్ గిల్‌కు భార్య, ముగ్గురు పిల్లలు ఉన్నారు. అయితే, తామిద్దరమూ పరస్పర అంగీకారంతోనే లైంగిక చర్యల్లో పాల్గొన్నామని గిల్ పేర్కొన్నారు. కానీ, బాధితురాలు తన నిస్సాహయత కారణంగానే అతడికి లొంగిపోయిందని భావించిన కోర్టు.. లైంగిక నేరానికి పాల్పడినట్లు నిర్ధారించింది. అతని ప్రవర్తనను పర్యవేక్షణ కోసం లైంగిక నేరస్థుల రిజిస్టర్‌లో కూడా చేర్చింది.

ఈ తీర్పుపై స్కాట్లాండ్ ప్రజా భద్రతా విభాగం పోలీస్ అధికారి ఫోర్బ్స్ విల్సన్ మాట్లాడుతూ.. ‘‘గిల్‌కు శిక్ష విధించడం లైంగిక నేరాలకు పాల్పడినట్లు రుజువైన వారికి స్పష్టమైన సందేశాన్ని పంపుతుంది.. బాధితులకు న్యాయం జరుగుతుంది.. గిల్ ఇప్పుడు భయంకరమైన ప్రవర్తన పరిణామాలను ఎదుర్కోవలసి ఉంటుంది. బాధితురాలు ధైర్యంగా ముందుకొచ్చిన తనకు ఎదురైన భయంకర అనుభవాన్ని వెల్లడించింది.. విచారణలో ఆమె పూర్తిగా సహకరించినందుకు ధన్యవాదాలు తెలియజేస్తున్నాను.. నేటి ఫలితం ఆమెకు కొంత ఉపశమనం కలిగిస్తుందని నేను ఆశిస్తున్నాను’’ అని అన్నారు.

‘‘లైంగిక వేధింపులను నిరోధించడానికి మేము కట్టుబడి ఉన్నా.. మాకు ప్రత్యేకంగా శిక్షణ పొందిన అధికారులు ఉన్నారు.. బాధితులకు సహాయం అందించడానికి భాగస్వాములతో కలిసి పని చేస్తున్నాం... లైంగిక వేధింపులు ఏ రూపంలో ఎదురైనా బయటపెట్టాలని ప్రోత్సహిస్తున్నాం.. అన్ని నివేదికలు క్షుణ్ణంగా పరిశోధిస్తాం’’ అని ఆయన పేర్కొన్నారు.