అగ్నిపథ్ పథకం ఓ అనాలోచిత నిర్ణయం: పంజాబ్ సీఎం భగవంత్ మాన్

అగ్నిపథ్ పథకం ఓ అనాలోచిత నిర్ణయమని పంజాబ్ సీఎం భగవంత్ మాన్ పేర్కొన్నారు. అందుకే అగ్నిపథ్ పథకాన్ని ఉపసంహరించుకోవాలని కేంద్రాన్ని ఆయన కోరారు. అగ్నిపథ్‌కు వ్యతిరేకంగా సాగుతున్న నిరసనలకు ఆయన మద్దతు ఇచ్చారు. ఈ కొత్త పథకం సైనికులను అవమానించే విధంగా ఉందని, పెద్దగా ఆలోచించకుండా దీనిని ప్రారంభించారని ఆయన విమర్శించారు. ఆలోచించకుండా తీసుకున్న నిర్ణయం కావడం వల్లే ఆశావహుల నుంచి భారీస్థాయిలో నిరసనలు వ్యక్తమవుతున్నాయని మాన్ అన్నారు.

అగ్నిపథ్‌ పథకానికి వ్యతిరేకంగా సాగుతున్న పోరాటాలతో రెండు రోజులుగా ఉత్తరప్రదేశ్, బీహార్, రాజస్థాన్, హర్యాణా, తెలంగాణ రాష్ట్రాలు అట్టుడుకుతున్నాయి. అభ్యర్థులు చేపట్టిన నిరసనలు హింసాత్మకంగా సాగుతున్నాయి. రైల్వే స్టేషన్‌లో రైలు బోగీలకు నిప్పు పెట్టారు. ప్రముఖ నాయకుల ఇళ్లను చుట్టుముడుతున్నారు. అయితే ఆందోళనలు చేపడుతున్న అభ్యర్థులకు కాంగ్రెస్‌తో సహా ఇతర ప్రతిపక్ష పార్టీలు మద్దతుగా నిలిచాయి.

నరేంద్ర మోదీ ప్రభుత్వానికి సైన్యం పట్ల గౌరవం లేదని కాంగ్రెస్ నేత రాహుల్ గాంధీ కూడా విమర్శించారు. అగ్నిపథ్ పథకాన్ని విమర్శిస్తూ కొత్త కార్యక్రమం కింద రిక్రూట్ చేయబడిన సైనికులకు నాలుగేళ్ల తర్వాత ర్యాంక్, పెన్షన్, స్థిరమైన భవిష్యత్తు ఉండదని రాహుల్ అన్నారు. మరోవైపు కేంద్రం తీసుకొచ్చిన ఈ అగ్నిపథ్‌ పథకంపై పలువురు ఆర్మీ, ఎయిర్‌ఫోర్స్ అధిపతులు హర్షం వ్యక్తం చేశారు. ఈ ఏడాది అగ్నిపథ్ నియామకాలకు వయోపరిమితిని పెంచుతూ కేంద్రం తీసుకున్న నిర్ణయాన్ని ప్రసంశించారు. కరోనా కారణంగా సైన్యంలో చేరే అవకాశం రాని యువతకు ఇది తోడ్పడుతుందని పేర్కొన్నారు.

కేంద్ర కేబినెట్ మంగళవారం ఆమోదం పొందిన ఈ కొత్త పథకం కింద రూ.30,000 ప్రారంభ వేతనంతో నాలుగేళ్లు సైనికులను నియమించనున్నారు. నాలుగేళ్ల తర్వాత 75 శాతం మంది సైనికులను రూ.11.71 లక్షల ప్యాకేజీతో వెనక్కి పంపగా, 25 శాతం మంది సైనికులను మరో 15 ఏళ్లపాటు అలాగే ఉంచుతారు. ఈ పదవీకాలం ముగియగానే తమకు ఉద్యోగాలు లేకుండా పోతాయని, ఇతర ప్రయోజనాలేవీ ఉండవని అభ్యర్థులు ఆగ్రహం వ్యక్తం చేశారు. దాంతో చాలామంది పెద్దఎత్తున ఆందోళనకు దిగారు.