మరీ అంతలా క్రిప్టో కరెన్సీ పతనం

క్రిప్టో కరెన్సీ యమ క్రేజ్ నుంచి ఇది వద్దురా బాబు అనే దుస్థితికి వచ్చేసింది. గ్లోబల్ క్రిప్టో కరెన్సీ మార్కెట్ పతనం అవుతూనే వస్తోంది. ‘బిట్ కాయిన్ రేటు డౌన్ ట్రెండ్‌లోనే కొనసాగుతూనే వస్తోంది. స్టాక్ మార్కెట్లతో పాటుగా క్రిప్టో మార్కెట్లు కూడా పతనం అవుతున్నాయి. బిట్ కాయిన్ డెయిలీ ట్రెండ్‌ను గమనిస్తే.. ఈ క్రిప్టో కరెన్సీ డిసెండింగ్ ఛానల్ ప్యాట్రన్‌ను ఏర్పాటు చేసింది. డెయిలీ ఆర్ఎస్‌ఐ 20 దిగువకు పడిపోయింది. రెండేళ్ల నుంచి చూస్తే ఆర్‌ఎస్‌ఐ ఈ స్థాయికి పడిపోవడం ఇదే తొలిసారి. బిట్ కాయిన్ ఇంకా ఓవర్ సోల్డ్ జోన్‌లోనే ఉంది. చాలా మంది ఈ స్థాయిలో బిట్ కాయిన్ కొనుగోలు చేయవచ్చని, ఇది మంచి ఛాన్స్ అని అనుకుంటున్నారు’ అని వజీర్‌ఎక్స్ ట్రేడ్ డెస్క్ అనలిస్ట్ టీమ్ వివరిస్తుంది.

ఈ వారం ఆరంభం నుంచి చూస్తే క్రిప్టో మార్కెట్ 100 బిలియన్ డాలర్లకు పైగా దిగివచ్చింది. కాయిన్ మార్కెట్ క్యాప్ ప్రకారం.. గ్లోబల్ క్రిప్టో మార్కెట్ గడిచిన 24 గంటల్లో 7 శాతం తగ్గుదలతో 893 బిలియన్ డాలర్లకు క్షీణించింది. గురువారం రోజున క్రిప్టో మార్కెట్ కొంత రికవరీని చూపింది. పలు ప్రముఖ క్రిప్టో కరెన్సీలు దాదాపు 10 శాతానికి పైగా పెరిగాయి. అయితే బలహీనమైన అంతర్జాతీయ సంకేతాల నేపథ్యంలో ఫైనాన్షియల్ మార్కెట్లు, క్రిప్టో మార్కెట్‌లో అమ్మకాల సునామీ కొనసాగుతోంది. గ్లోబల్ క్రిప్టో మార్కెట్ వాల్యూమ్ కూడా గడిచిన 24 గంటల్లో 40 శాతం పతనమైంది. 76 బిలియన్ డాలర్లకు క్షీణించింది. మార్కెట్ సెంటిమెంట్ బేరిష్‌గా ఉండటంతో బిట్ కాయిన్, ఇథీరియం రేట్లు కూడా నష్టాల్లోనే ఉన్నాయి.

బిట్ కాయిన్ ధర గత 7 రోజుల్లో ఏకంగా 32 శాతం పడిపోయింది. గడిచిన 24 గంటల్లో దాదాపు 8 శాతం క్షీణించింది. ప్రస్తుతం దీని రేటు 20,621 డాలర్ల వద్ద కదలాడుతోంది. ఇథీరియం రేటు కూడా తగ్గింది. 11 శాతం కుప్పకూలింది. 1089 డాలర్ల వద్ద ట్రేడ్ అవుతోంది. గత వారం రోజుల్లో చూస్తే దీని రేటు దాదాపు 40 శాతం పడిపోయింది. బినాన్స్ కాయిన్ రేటు ఈరోజు 7 శాతం తగ్గింది. 214 డాలర్ల వద్ద కదలాడుతోంది. ఎక్స్ఆర్‌పీ రేటు 3.4 శాతం పడిపోయింది. 0.33 డాలర్లకు క్షీణించింది. సొలానా రేటు దాదాపు 11 శాతం కుప్పకూలింది. 30 డాలర్లకు తగ్గింది. కార్డానో రేటు దాదాపు 7 శాతం క్షీణించింది. 0.4 డాలర్లకు తగ్గింది. డోజికాయిన్ రేటు కూడా వారం రోజుల్లో 7 శాతం నేలచూపులు చూసింది. 0.05 డాలర్ల వద్ద ఉంది.