పెళ్లి సంబరాలు గడిచిన కొన్ని గంటల్లోనే యాక్సిడెంట్ లో వరుడు మరణం

విధిరాత గురించి ఎవరు చెప్పలేరు. దానిని నుంచి ఎవరూ తప్పించుకోలేరు. వివాహమై గంటలు కూడా గడవక ముందే వరుడ్ని మృత్యువు వెంటాడింది.రెండు కుటుంబాల్లోనూ తీవ్ర విషాదం నింపింది. శ్రీకాకుళం జిల్లా ఎల్‌ఎన్‌పేట మండలం పెద్దకొల్లివలస ఆర్‌అండ్‌ఆర్‌ కాలనీకి చెందిన పవన్‌కుమార్‌ ,అశ్యామలాపురం ఆర్‌అండ్‌ఆర్‌ కాలనీకి చెందిన యువతితో శుక్రవారం రాత్రి సింహాచలం దేవస్థానంలో వివాహం జరిగింది. పెళ్లి తర్వాత శనివారం మధ్యాహ్నం వరుడి తల్లిదండ్రులు వధువు, ఆమె తల్లి బస్సులో వారి స్వగ్రామానికి బయల్దేరారు. పవన్‌కుమార్‌ తన మామ బలగ సోమేశ్వరరావుతో కలిసి బైక్‌పై బయల్దేరాడు.

ఎచ్చెర్ల మండలం అరిణాం అక్కివలస పెట్రోల్‌ బంకుకు చేరుకునేసరికి అక్కడి హైవేపై వీరి వాహనాన్ని వెనుక నుంచి వస్తున్న కంటైనర్‌ వేగంగా వచ్చి ఢీకొట్టింది. ఈ ఘటనలో పవన్‌కుమార్‌ అక్కడికక్కడే చనిపోగా.. బైక్‌ వెనుక కూర్చొన్న సోమేశ్వరరావు తీవ్రంగా గాయపడడంతో ఆస్పత్రికి తరలించారు. వివాహం జరిగిన కొన్ని గంటల సమయానికే వరుడు ఇలా చనిపోవడం స్థానికంగా తీవ్ర విషాదాన్ని నింపింది.

పవన్‌కుమార్‌ తాపీమేస్త్రి కాగా స్థానికంగా ఉండే యువతితో పరిచయం పెంచుకున్నాడు. ఆరు నెలల కిందట పెద్దలను ఎదిరించి ఆమెను గ్రామానికి తీసుకొచ్చాడు. అప్పటి నుంచి ఇద్దరూ కలిసే ఉంటున్నారు. ప్రస్తుతం ఆమె మూడు నెలల గర్భిణి కాగా.. రెండు నెలలుగా ఇరు కుటుంబాల పెద్దల రాజీ ప్రయత్నాలు చేశారు. శుక్రవారం రాత్రి ఇద్దరికీ వివాహం చేశారు. పెళ్లి జరిగిన మరుసటి రోజే వరుడు చనిపోవడం రెండు కుటుంబాల్లో విషాదం నింపింది. పోలీసులు కేసు నమోదు చేసి దర్యాప్తు చేస్తున్నారు.