ఉద్యోగాలే లేనప్పుడు.. కేవలం రామనామ జపంతో ప్రయోజనం ఉండదు: సీఎం ఉద్దమ్ ఠాక్రే

ఏటా రెండు కోట్ల ఉద్యోగాలు కల్పిస్తామని పెద్దఎత్తున హామీలు ఇస్తున్నారు.. కానీ, ఏం చేస్తారు? ఏం లేదు.. అగ్నిపథ్‌, అగ్నివీరుల వంటి పెద్ద పెద్ద పేర్లతో పథకాలు తెస్తారు.. యువతకు ఉద్యోగాలే లేనప్పుడు.. కేవలం రామనామ జపంతో ప్రయోజనం ఉండదు అని మహారాష్ట్ర ముఖ్యమంత్రి ఉద్ధవ్‌ ఠాక్రే  స్పష్టంచేశారు. తన ప్రజలకు ఇచ్చిన వాగ్దానాలను శివసేన ఎన్నడూ విస్మరించలేదు. అందుకే.. బలంగా కొనసాగుతోందని ఆయన అన్నారు.

సైనిక నియమాకాల కోసం కేంద్రం తీసుకొచ్చిన ‘అగ్నిపథ్‌’పై ప్రతిపక్షాలు తీవ్ర విమర్శలు గుప్పిస్తున్నాయి. తాజాగా, ఈ పథకంపై ఆయన విరుచుకుపడ్డారు. కాంట్రాక్ట్ విధానంలో సైనిక నియామకాలు ప్రమాదకరమని, యువత ఆశయాలు, జీవితాలతో ఆడుకోవడం సరికాదని కేంద్రానికి సూచించారు. శివసేన 56వ వ్యవస్థాపక దినోత్సవం సందర్భంగా ఆదివారం ఏర్పాటు చేసిన కార్యక్రమంలో ఆయన మాట్లాడుతూ... అగ్నిపథ్ విషయంలో కేంద్రం తీరును ఎండగట్టారు.

‘రేపు అద్దెకు ప్రభుత్వం కావాలంటారు.. ప్రధాని, ముఖ్యమంత్రుల ఎంపిక కోసం టెండర్లు పిలుస్తారు.. ఒకవేళ ఇలాగే కొనసాగించాలనుకుంటే.. ప్రతిదానికీ అద్దెకు తీసుకుని తొలగించే (హైర్‌ అండ్‌ ఫైర్‌), వాడి పడేసే(యూజ్ అండ్ త్రో) నియామక విధానాలను అవలంబించాలి’ అని ఠాక్రే చురకలంటించారు. అగ్నిపథ్‌కు వ్యతిరేకంగా ఆయా ప్రాంతాల్లో ఆందోళనలు హింసాత్మకంగా మారినప్పటికీ.. తమ రాష్ట్రం ప్రశాంతంగా ఉందని సీఎం పేర్కొన్నారు. కొత్త సాగు చట్టాల పేరుతో తొలుత రైతులు వీధుల్లోకి వచ్చేలా చేశారని ధ్వజమెత్తారు.

‘పథకాలకు అగ్నివీర్, అగ్నిపథ్ వంటి అర్థంలేని పేర్లను ఎందుకు పెడుతున్నారు? 17 నుంచి 21 ఏళ్లలోపు యువత సైన్యంలో చేరి నాలుగేళ్ల సర్వీసు తర్వాత ఏం చేస్తారు? ఈ రోజు నాది కావచ్చు.. రేపు మరొకరు మంచి ప్రత్యామ్నాయంగా ఉద్భవిస్తారు’’ అని వ్యాఖ్యానించారు. నిలబెట్టుకోగలిగే వాగ్దానాలను మాత్రమే చేయాలని కేంద్రాన్ని ఉద్దేశించి ఉద్ధవ్‌ వ్యాఖ్యలు చేశారు.

మరోవైపు, అగ్నిపథ్‌పై వ్యతిరేకత వస్తున్నప్పటికీ కేంద్రం వెనకడుగు వేసే ప్రసక్తేలేదని తేల్చిచెప్పింది. సైన్యంలో సగటు వయసు తగ్గించేందుకే సంస్కరణలు తీసుకొస్తున్నామని చెబుతోంది. పదవీ విరమణ పొందే అగ్నివీరులకు రక్షణ శాఖ ఉద్యోగాలు, కేంద్ర సాయుధ పోలీసు బలగాలు(సీఏపీఎఫ్‌), అస్సాం రైఫిల్స్‌ నియామకాల్లో 10 శాతం రిజర్వేషన్లు కల్పిస్తామని కేంద్రం ప్రకటించింది. ఇప్పటికే ఈ ఏడాది జరగబోయే నియామకాలకు గరిష్ఠ వయోపరిమితిని రెండేళ్లు పొడిగించింది.