క్రేజీ కోసం...వింత వింత బరాత్ లు..యూపీలో బల్డోజర్ బరాత్

బల్డోజర్ అంటేనే యోగి సర్కార్ గుర్తుకొస్తోంది. దీంతో పెళ్లిలో ఈ రకమైన చర్యకు దిగితే ఫేమస్ అవుతానని ఓ పెళ్లికొడుకు భావించాడు అనుకొందే తడువుగా బల్డోజర్ ఎక్కి కళ్యాణ మంటపానికి చేరుకొన్నాడు. పెళ్లి అంటే ఆట, పాట, బరాత్ ఇవన్నీ ఉంటాయి. ఇవేమీ లేకుండా సాదాసీదాగా చేసుకునే వివాహం చేసుకున్నవాళ్లు చాలా తక్కువ. కొంతమంది తమ పెళ్లి ఎప్పటికీ గుర్తుండిపోవాలని.. ఇంకొంచెం వెరైటీగా చేసుకుంటుంటారు. ఉత్తరప్రదేశ్‌లో ఒక వరుడు అలాంటి ప్రయత్నమే చేశాడు. సాధారణంగా పెళ్లి కొడుకు గుర్రంపైనో.. కారులోనో ఊరేగిపుంగా వధువు ఇంటికి చేరుకుంటాడు. కానీ ఉత్తరప్రదేశ్‌లో బహ్రైచ్ జిల్లా లక్ష్మణ్‌పూర్ నుంచి వరుడు బాద్షా బుల్డోజర్‌పై బరాత్‌గా పెళ్లికూతురు ఇంటికి వెళ్లాడు.

బుల్డోజర్‌పై వచ్చిన వరుడు "బుల్డోజర్ బాబాకి జై" అంటూ నినాదాలు కూడా చేశాడు. దాంతో గ్రామమంతా పండుగ వాతావరణం నెలకొంది. అలాగే పెళ్లికొడుకు బుల్డోజర్‌‌పై వచ్చినందుకు గ్రామ ప్రజలు ఆశ్చర్యపోవడమే కాకుండా.. అందంగా అలకరించిన ఆ బుల్డోజర్‌తో గ్రామ ప్రజలు సెల్ఫీ తీసుకోవడానికి ఎగబడ్డారు. దీనికి సంబంధించిన వీడియో సోషల్ మీడియాలో వైరల్ అయింది. అయితే దీనిపై పెళ్లి కొడుకు స్పందించాడు. "నేను నా పెళ్లిని మరపురాని ఈవెంట్‌గా మార్చాలనుకున్నాను. ఈ ఆలోచన కూడా భిన్నంగా ఉంటుందని నేను అనుకున్నాను." అని బాద్షా చెప్పాడు. మొత్తానికి బుల్డోజర్‌ ట్రెండ్ పెళ్లిళ్లకు కూడా పాకింది.

అయితే ఈ మధ్య కాలంలో పెళ్లిల్లో ఇలాంటి వింత ఘటనలు అడపాదడపా చోటుచేసుకుంటూనే ఉన్నాయి. కొన్ని రోజుల క్రితం మధ్యప్రదేశ్‌లో పెళ్లికూతురు మండపానికి ట్రాక్టర్‌లో వెళ్లి అందరికి షాక్ ఇచ్చింది. భారతీ తగ్డే అనే అమ్మాయి సంప్రదాయ పద్ధతిలో కాకుండా నల్ల కళ్లద్దాలు పెట్టుకుని..

స్వయంగా తానే ట్రాక్టర్‌ని నడుపుకుని పెళ్లి మండపానికి చేరుకుంది. తన ఇద్దరు సోదరులతో కలసి అలా వచ్చిన వధువును చూసి అందరూ ఉలిక్కిపడ్డారు. బెతుల్ జిల్లాలోని జావ్రా గ్రామంలో మంగళవారం భారతీ వివాహం జరిగింది. అయితే తన పెళ్లి రోజున ఏదైనా వెరైటీ చేయాలనుకుంది. అందుకే జీవితాంతం గుర్తిండిపోయేలా అలా ట్రాక్టర్‌పై వచ్చింది.