నిరసన తెలిపే వారు జీహాదీలు, స్వార్థపరులు: బీజేపీ ఎమ్మెల్యే హరిభూషణ్ ఠాకూర్

అగ్నిపథ్ ను వ్యతిరేకిస్తున నిరసన కారులపై బీజేపీ నేతలు మండిపడుతుండగా, కేంద్రంపై ఇతర పార్టీలు ధ్వజమెత్తుతున్నాయి. కేంద్రం తీసుకొచ్చిన అగ్నిపథ్ స్కీమ్‌పై దేశం అట్టుడుకుతుంది. అన్ని రాష్ట్రాల్లో నిరసనలు వెల్లువెత్తుతున్నాయి. ఈ క్రమంలో ఓ బీజేపీ ఎమ్మెల్యే నిరసనకారులపై వివాదాస్పద వ్యాఖ్యలు చేశారు. అగ్నిపథ్ పథకానికి వ్యతిరేకంగా నిరసన తెలిపే వారు జీహాదీలు, స్వార్థపరులు అని బీజేపీ ఎమ్మెల్యే హరిభూషణ్ ఠాకూర్ సోమవారం అన్నారు. వారికి దేశభక్తితో సంబంధం లేదని మధుబని జిల్లాలోని బీప్సీ ఎమ్మెల్యే అయిన హరిభూషణ్ ఠాకూర్ అన్నారు. "అగ్నిపథ్ స్కీమ్‌కి వ్యతిరేకంగా నిరసన తెలిపే వారు జిహాదీలు లేదా వారు స్వార్థపరులు. దేశానికి సేవ చేయాలనుకునే వారు ఈ పథకం పట్ల చాలా సంతోషంగా ఉన్నారు. ఇది ఉద్యోగం కాదు దేశానికి చేసే సేవ. దాని కోసం ప్రజలు తమ జీవితాలను త్యాగం చేయాలి." అని ఠాకూర్ అన్నారు. అంతేకాదు రక్షణ దళాలలో అధికారాలు, విలాసాలను కోరుకునే వారికి ఇది ఉద్యోగం కాదని ఆయన అన్నారు. దేశానికి సేవ చేయడానికి నాలుగేళ్లు అవకాశం ఇస్తున్నామని హరిభూషణ్ ఠాకూర్ అన్నారు.

అలాగే ఆందోళనకారులు చేస్తున్న నిరసనలు ప్రణాళికబద్ధంగా జరుగుతున్న హింసగా అభివర్ణించారు. ఆందోళనకారులు రైలుకు నిప్పు పెడుతున్నారని, బీజేపీ నేతలపై దాడి చేస్తున్నారని విమర్శించారు. దేశంలోని యువతను కొందరు తప్పుదోవ పట్టిస్తున్నారని ఠాకూర్ ఆరోపించారు. అయితే ఠాకూర్ వ్యాఖ్యలను ఆర్జేడీ నేత శక్తిసింగ్ యాదవ్ ఖండించారు.

"యువత అగ్నిపథ్ పథకంతో సంతృప్తి చెందలేదు. కాబట్టి ప్రధాన మంత్రి నరేంద్ర మోడీ వారితో కమ్యూనికేట్ చేయాలి. ప్రస్తుతం రైతులు, సైనికులు ఈ ప్రభుత్వం పట్ల సంతృప్తిగా లేరు. దేశాన్ని విభజించాలనుకుంటున్నారా..?" అని శక్తి సింగ్ ప్రశ్నించారు. మరోవైపు ఐదో రోజు కూడా బీహార్‌లో ఆందోళనలు కొనసాగాయి. పాట్నాలో, కార్గిల్ చౌక్ వద్ద ఏఐఎస్ఏ ఆధ్వర్యంలో యువకులు పెద్ద సంఖ్యలో నిరసన తెలిపారు. ఇటు అర్వాల్‌లో సీపీఐ (ఎంఎల్) నాయకులు, మద్దతుదారులు చేతిలో పోస్టర్లు, బ్యానర్లు పట్టుకుని కేంద్ర ప్రభుత్వానికి వ్యతిరేకంగా నినాదాలు చేశారు.