టీచర్ కావాలనుకొనేలోపు...ఎమ్మెల్యే అయిపోయారు

టీచర్ కావాలనుకొన్నారు..కానీ విధి రాత  ఆయన్ని రాజకీయ నేతగా మల్చింది...రెండు సార్లు ఎమ్మెల్యేను చేసింది. వివరాలలోకి వెళ్లితే... ఏపీలో 1998 డీఎస్సీ అభ్యర్థులకు చిక్కులు తొలగిపోయాయి.. కోర్టు వివాదాలు పరిష్కారం కావడంతో ఇప్పుడు ఉద్యోగాలు దక్కాయి. లేటు వయసులో చాలామందికి కొలువులు దక్కాయి. ఈ జాబితాలో అనకాపల్లి జిల్లా చోడవరం ఎమ్మెల్యే కరణం ధర్మశ్రీ  కూడా చేరారు. ఆయన కూడా 1998 డీఎస్సీలో ఎంపికయ్యారు. రాజకీయాల్లోకి రాకముందు.. సుమారు పాతికేళ్ల క్రితం ధర్మశ్రీ డీఎస్సీ రాసి అర్హత సాధించారు. ఇప్పుడు ఆయనకు టీచర్‌గా ఉద్యోగ అవకాశం వచ్చింది. ఈ విషయం తెలియడంతో ఆయన ఆనందం వ్యక్తం చేశారు.

ధర్మశ్రీ పాత జ్ఞాపకాలను అందరితో పంచుకున్నారు. తాను ఉపాధ్యాయునిగా స్థిరపడాలనుకున్నానని.. మద్రాసు అన్నామలై యూనివర్సిటీలో బీఈడీ చదివానన్నారు. 1998 డీఎస్సీ పరీక్ష రాసి అర్హత సాధించినా అది పెండింగ్‌లో ఉండిపోయిందన్నారు. ఆ తర్వాత బీఎల్‌ చేరానని.. ఆ సమయంలోనే రాజకీయాల్లోకి ఎంట్రీ ఇచ్చినట్లు కాంగ్రెస్‌ పార్టీ జిల్లా యువజన విభాగంలో క్రియాశీలకంగా వ్యవహరించాను అన్నారు. ఈ 25 ఏళ్ల రాజకీయ ప్రస్థానంలో రెండుసార్లు ఎమ్మెల్యేగా విజయం సాధించానన్నారు.

దివంగత ముఖ్యమంత్రి వైఎస్ రాజశేఖరరెడ్డి అనుచరునిగా సుస్థిర స్థానాన్ని సంపాదించుకున్నానని ఆనందం వ్యక్తం చేశారు. ఇప్పుడు వైఎస్సార్‌సీపీలో సముచిత స్థానంలో ఉన్నానని.. అప్పుడే ఉద్యోగం వస్తే రాజకీయాల కంటే ఉపాధ్యాయ వృత్తికే ప్రాధాన్యం ఇచ్చేవాడినని చెప్పుకొచ్చారు. ముఖ్యమంత్రి వైఎస్ జగన్‌మోహనరెడ్డి తీసుకున్న చొరవ వల్ల పాతికేళ్లుగా ఎదురుచూస్తున్న నిరుద్యోగ ఉపాధ్యాయుల కల నెరవేరిందని హర్షం వ్యక్తం చేశారు. ముఖ్యమంత్రికి డీఎస్సీ 1998 బ్యాచ్‌ తరఫున కృతజ్ఞతలు తెలిపారు.