వర్క్ ఫ్రం హోం బెటర్ అంటున్న శ్రీలంక

గత కొన్ని నెలలుగా శ్రీలంక ఆర్థిక సంక్షోభంలో కూరుకుపోయింది. విదేశీ మారక నిల్వలు తగ్గిపోవడం, అప్పులతో శ్రీలంక దేశం కుదేలైంది. దాంతో ఉప్పు దగ్గర నుంచి అన్ని ధరలు ఆకాశాన్నంటాయి. అప్పటి నుంచి ప్రజలు నానా పాట్లు పడుతున్నారు. ఆహారం, మందులు, పెట్రోల్ దొరకక యాతన పడుతున్నారు. ఈ క్రమంలో తాము సంపాదించలేమని, తమ కుటుంబాలను పోషించలేమని చాలామంది బాధపడుతున్నారు. అంతేకాదు ఇంటికి వెళ్లడానికి పెట్రోల్ లేకపోవడంతో బంక్‌ల దగ్గరే ఉండిపోతున్నారు. వారం రోజుల నుంచి ఇంధన స్టేషన్ల దగ్గర క్యూలు పెరిగాయి.

శ్రీలంకలో దారుణమైన పరిస్థితులు కొనసాగుతూనే ఉన్నాయి. తీవ్రమైన ఇంధన కొరతతో అక్కడి ప్రజలు ఇబ్బందులు పడుతున్నారు. పెట్రోల్, డీజిల్ కోసం రోజుల తరబడి క్యూలో నిలబడి.. ప్రాణాలు కూడా కోల్పోతున్నారు. ఇలాంటి పరిస్థితుల్లో పెట్రోల్, డీజిల్ వినియోగాన్ని తగ్గించుకునేందుకు అక్కడి ప్రభుత్వం ఓ కీలకమైన నిర్ణయం తీసుకుంది. కొలంబోలో స్కూళ్లను మూసివేయాలని, ఉద్యోగులను ఇంటి నుంచే పనిచేయమని ఆదేశించింది. శ్రీలంక ప్రభుత్వానికి ప్రస్తుతం ఇంధనాన్ని దిగుమతి చేసుకునే స్థోమత లేకపోయింది. దాంతో ప్రత్యామ్నాయ మార్గాలను అన్వేషిస్తోంది.

ప్రస్తుతం ఇంధనాన్ని దిగుమతి చేసుకునే స్థితిలో శ్రీలంక ప్రభుత్వం లేదు. దేశంలో 9,000 టన్నుల డీజిల్, ఆరు వేల టన్నుల పెట్రోల్ నిల్వలు మాత్రమే ఉన్నాయని విద్యుత్, ఇంధన శాఖ మంత్రి కాంచన విజేశేఖర ఆదివారం తెలిపారు. ఇందులో భాగంగా తదుపరి ఆదేశాలు వచ్చే వారకు కొలంబోలో ప్రభుత్వ ఉద్యోగులను ఇంటి నుంచే పని చేయమని ప్రభుత్వం ఆదేశించింది. అలాగే పాఠశాలలను ఒక వారంపాటు మూసివేయాలని సూచించింది. ప్రస్తుతం దేశంలో ఉన్న కొంచెం ఇంధనాన్ని ప్రజా రవాణా, విద్యుత్ ఉత్పత్తి, వైద్య సేవల కోసం అందించేందుకు ప్రాధాన్యత ఇస్తున్నారు. అలాగే కొన్ని పోర్టులు, విమానాశ్రయాలకు రేషన్ పద్ధతిలో ఇస్తున్నారు.