భర్త టాలెంట్ ను అలా వాడేసుకొని సొమ్ము చేసుకొంటోంది

ఎదుటి వ్యక్తిలోని ప్రతిభను గుర్తించి వాటిని తన ప్రయోజనాలకు వాడుకోవడం నేడు గొప్ప టాలెంట్ అని చెప్పవచ్చు. అలాంటిదో ఈ ఘటన. ఒకామె తన భర్తను అద్దెకు ఇస్తుంది. అదేంటి భర్తను రెంట్‌కు ఇవ్వడం ఏమిటి అని ఆశ్చర్యంగా అనిపిస్తుంది కదా. వినడానికే వింతగా ఉంది కదా.. కానీ ఇది అక్షరాల నిజం. కానీ దీని వెనుకున్న అసలు కారణం తెలుసుకుంటే.. కచ్చితంగా గౌరవం కలుగుతుంది. యూకేకి చెందిన లారా యంగ్ అనే మహిళ తన భర్త జేమ్స్, ముగ్గురు పిల్లలతో కలసి బకింగ్‌ హామ్‌షైర్‌లో ఉంటుంది. జేమ్స్ చాలా మంచివాడు. ఇంట్లో ఎలాంటి పనులైనా అవలీలగా చేసేస్తాడు.

ఇంటిని అందంగా పెట్టడం దగ్గర నుంచి.. ఎలక్ట్రికల్ వర్క్ వరకు అని చకచకా చేసేస్తాడు. ఇంత టాలెంట్‌ ఉన్న భర్తను.. ఖాళీగా ఉంచడం ఎందుకని జేమ్స్ భార్య అనుకుంది. కొంత అదనపు డబ్బు సంపాదించాలనే ఆలోచన చేసింది. అందుకే Rent My Handy Husband వెబ్‌సైట్‌ను ప్రారంభించింది. పైగా సోషల్ మీడియా ద్వారా గట్టి ప్రచారం చేసింది. ఏ పనులైన చేస్తాడా..? అని యూజర్లు అడగడం మొదలుపెట్టారు. దాంతో ఆమె మీకు ఇంటి పనిలో సాయం ఉంటాడని, చిన్న పనులైనా చక్కగా చేస్తాడని, తన పనితీరుతో మెప్పిస్తాడని ఆమె చెప్పుకొచ్చింది.

అయితే జేమ్స్‌తో పనులు చేయించుకోవడానికి కొంత జీతం ఇవ్వాల్సి ఉంది. ఆ డబ్బును లారా ఫిక్స్ చేసింది. ఆమె పెట్టిన రూల్ ప్రకారం జేమ్స్‌‌ను రెంట్‌కు తీసుకునేవారు 35 పౌండ్లు అంటే రూ.3352లు చెల్లించాలి. ఆ డబ్బు చెల్లించేవారు ఎంత పెద్ద పనులైనా చేయించుకోవచ్చు. వికలాంగులకు, విద్యార్థులకు, 65 ఏళ్లు పైబడిన పెద్దవాళ్లకు మాత్రం తక్కువ ధరలోనే జేమ్స్ తన సేవలు అందిస్తాడు.

కొంతమందికి లారా ఐడియా బాగా నచ్చింది. అందుకే ఆమె భర్తను అద్దెకు తీసుకోవడానికి ఎలాంటి అభ్యంతరం లేదని ఆమెకు తెలియజేశారు. నిజానికి జేమ్స్ మంచి పనిమంతుడు. మాజీ వేర్‌హౌస్ వర్కర్. కొన్నేళ్ల కిందట అతడు లారాకు, వారి ముగ్గురు పిల్లలతో తోడుగా ఉండడం కోసం తన ఉద్యోగాన్ని వదులుకున్నాడు. జేమ్స్ పిల్లల్లో ఇద్దరు ఆటిస్టిక్‌తో బాధపడుతున్నారు. వారికి సాయంగా ఉంటూనే చిన్న చిన్న పనులు చేస్తూ డబ్బులు సంపాదిస్తున్నాడు.