సంకీర్ణ ప్రభుత్వాలతో ..ఇజ్రాయెల్ సతమత

ఏపార్టీకి స్పష్టమైన మెజార్టీ రాకపోతే ఏం  జరుగుతుందో మన దేశంలోని రాజకీయ పరిస్థితులు చూస్తే చాలు. కానీ ఇజ్రాయెల్ వంటి దేశంలోనూ సంకీర్ణ ప్రభుత్వాల దుస్తితి ఏమిటో తేటతేలమవుతోంది. ఇజ్రాయెల్ ప్రభుత్వం మళ్లీ రద్దు అయింది. దీంతో నాలుగేళ్లలోనే ఇజ్రాయెల్‌లో ఐదోసారి ఎన్నికలు జరగాల్సిన పరిస్థితి ఏర్పడింది. ఎన్నికల తేదీని కూడా ఇప్పుడే ఖరారు చేశారు. ఈ మేరకు నవంబర్ ఒకటో తేదీన ఎన్నికలకు వెళ్లేందుకు ఇజ్రాయెల్ సిద్ధమవుతుంది. బెంజమిన్ నేతన్యాహూ 12 ఏళ్ల పాటు సుదీర్ఘ పాలన అనంతరం ఇజ్రాయెల్లో ప్రభుత్వాలు కనీసం పదిరోజులు కూడా కొనసాగడం లేదు. ఏ పార్టీకి స్పష్టమైన మెజారిటీ రాకపోవడం, సంకీర్ణ ప్రభుత్వాల మధ్య సఖ్యత లేకపోవడం వల్ల అక్కడి ప్రభుత్వాల పరిస్థితి మూణ్ణాళ్ల ముచ్చటగా మారింది.

పార్లమెంట్‌ రద్దుపై గురువారం జరిగిన ఓటింగ్‌లో అనుకూలంగా 92 మంది సభ్యులు ఓటేశారు. 120 సభ్యులు ఉండే పార్లమెంట్‌లో ఇంత భారీ సంఖ్యలో అంగీకారం రావడంతో వెంటనే పార్లమెంట్ రద్దు అవుతున్నట్టు ప్రకటించారు. దీంతో ఇప్పటి వరకు ఇజ్రాయెల్ విదేశాంగ మంత్రిగా కొనసాగిన యైర్ లాపిడ్ శుక్రవారం అర్థరాత్రి నుంచి తాత్కాలిక ప్రధానమంత్రిగా కొనసాగనున్నారు. నవంబర్ ఒకటో తేదీన కొత్తగా ఎన్నికలు జరగనున్నాయి. దీంతో నాలుగేళ్లలో ఐదోసారి ఎన్నికలు జరుగుతున్నాయి.

సుదీర్ఘ కాలంలో ప్రభుత్వాన్ని నడిపించిన నేతాన్యాహూపై అనేక అవినీతి ఆరోపణలు వచ్చాయి. తర్వాత నుంచి ఇజ్రాయెల్ రాజకీయ సంక్షోభంలో కొట్టుమిట్టాడుతుంది. మెజారిటీతో పాలక కూటమిని ఏర్పాటు చేయడానికి తగినన్ని సీట్లు సాధించడంలో పార్టీలు పదేపదే విఫలమవుతున్నాయి. ఇలాంటి నేపథ్యంలో జరగబోయే ఎన్నికల్లో ఏ పార్టీకి మెజార్టీ వచ్చే అవకాశం లేదని అక్కడి రాజకీయ విశ్లేషకులు అభిప్రాయపడుతున్నారు.