ఔను ఆ అమ్మాయిలిద్దరూ ఇష్టపడ్డారు

మారుతున్న సమాజంలో వింత జంటలు మనకు తెరపై కనిపిస్తున్నాయి. మగాళ్లు..మగాళ్లు  పెళ్లిలు  చేసుకోవడం, అమ్మాయిలు...అమ్మాయిలు ఇష్టపడటం వంటివి ఆందోళన కలిగించే సంబంధాలు తెరపైకి వస్తున్నాయి. తాజాగా ఉత్తరప్రదేశ్‌లో మీరట్‌లో ఇద్దరి అమ్మాయిలు ప్రేమించుకుని, పెళ్లి చేసుకున్నారు. ఈ విషయం తెలుసుకున్న కుటుంబ సభ్యులు వారిని తీవ్రంగా కొట్టారు. అయినా సరే వారిద్దరూ తమ మనస్సును మార్చుకోలేదు. ఈ పంచాయితీ కాస్తా పోలీస్ స్టేషన్‌ వరకు వెళ్లింది. అయినా ఆ అమ్మాయిలు కుటుంబ సభ్యులు మాట, పోలీసుల మాట కూడా వినలేదు.

లాల్‌కుర్తికి చెందిన అమ్మాయి, శాస్త్రినగర్‌కు చెందిన బాలిక.. నగరంలోని ఒక కళాశాలలో బీకామ్ చదువుకున్నారు. ఆ క్రమంలో ఇద్దరికి పరిచయం అయింది. ఆ పరిచయం కాస్తా ప్రేమగా మారింది. తర్వాత ఇద్దరూ ఓ ప్రైవేట్ కంపెనీలో ఉద్యోగ నిమిత్తం నోయిడాకు వెళ్లారు. అప్పటి నుంచి ఇద్దరూ కలిసే ఉంటున్నారు. ఈ క్రమంలో వారిద్దరూ పెళ్లి చేసుకోవడానికి నిర్ణయం తీసుకున్నారు. వారి పెళ్లిని రిజిస్ట్రేషన్‌ చేసేందుకు ఏర్పాట్లు చేసుకున్నారు.

దాంతో వారి కుటుంబాలకు విషయం తెలిసింది. ఇద్దరు అమ్మాయిల పెళ్లి చేసుకోవడం ఏమిటని ఆగ్రహానికి గురయ్యారు. వారిని చితకబాదారు. నోయిడా నుంచి ఓ యువతిని లాల్కుర్తి తీసుకెళ్లిపోయారు. ఈ విషయం పోలీసుల వరకు వెళ్లింది. కానీ పోలీసుల ఎదుటే అమ్మాయిలు ఒకరినొకరు వివాహం చేసుకోవాలనుకుంటున్నామని స్పష్టంగా చెప్పారు.

పెళ్లి చేసుకోకపోతే చచ్చిపోతామని కూడా అన్నారు. తమను ఎవరూ విడదీయలేరని కూడా అన్నారు. అయితే ఈ పెళ్లి సరైనది కాదని అమ్మాయిలిద్దరిని ఒప్పించేందుకు కుటుంబ సభ్యులు తీవ్రంగా ప్రయత్నిస్తున్నారు. అయితే ఇరువర్గాలు మొండిగా వ్యవహరిస్తే నిబంధనల ప్రకారం చర్యలు తీసుకుంటామని పోలీసులు అంటున్నారు.