ట్విట్టర్...కేంద్ర ప్రభుత్వం మధ్య మళ్లీ జగడం...కర్ణాటక హైకోర్టుకు చేరిన పంచాయతీ

ట్విట్టర్ యాజమాన్యానికి కేంద్రంలోని బీజేపీ ప్రభుత్వానికి మధ్య మళ్లీ జగడం మొదలైంది. కొత్త ఇన్ఫర్మేషన్ టెక్నాలజీ (ఐటీ) నిబంధనల ప్రకారం.. తన ప్లాట్‌ఫారమ్ నుంచి కంటెంట్‌ను తీసివేయాలన్న కేంద్రం ఆదేశాలను సవాలు చేస్తూ ట్విట్టర్ కర్ణాటక హైకోర్టు (హెచ్‌సీ)ని ఆశ్రయించింది. ఐటీ చట్టంలోని సెక్షన్ 69ఏ కింద టేక్ డౌన్ నోటీసులను పాటించేందుకు కేంద్రం ఇటీవల ట్విట్టర్‌కు చివరి అవకాశం ఇచ్చింది. గత వారం కేంద్రం పంపిన నోటీసులో జూన్ 6, జూన్ 9 న ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖ  జారీ చేసిన రెండు టేక్ డౌన్ ఆర్డర్‌లను పాటించడంలో విఫలమైందని ట్విట్టర్‌ను హెచ్చరించింది. ట్విట్ట‌ర్‌ను ఉల్లంఘించడం కొనసాగితే, కొత్త ఐటీ నిబంధనల ప్రకారం మధ్యవర్తిగా తమ రక్షణను కోల్పోవచ్చని కేంద్రం తెలిపింది.

అంతకుముందు, ఎలక్ట్రానిక్స్, ఐటీ మంత్రిత్వ శాఖ ట్విట్టర్‌ను నిబంధనలను పాటించాలని కోరింది. జూలై 4 వరకు గడువు విధించింది. తుది నోటీసును పాటించడంలో ట్విట్టర్ విఫలమైతే, అది మధ్యవర్తి స్థితిని కోల్పోయే అవకాశం ఉందని స్పష్టం చేసింది. జూన్ 27న ప్రభుత్వం జారీ చేసిన తుది నోటీసుకు సోషల్ మీడియా ప్లాట్‌ఫామ్ ట్విట్టర్ కట్టుబడి ఉందని అధికారిక మూలం వార్తా సంస్థ పీటీఐకి తెలిపింది. సోషల్ మీడియా ప్లాట్‌ఫారమ్ 2021లో ప్రభుత్వం నుంచి వచ్చిన అభ్యర్థన ఆధారంగా జూన్ 26న బ్లాక్ చేసిన 80కి పైగా ట్విట్టర్ ఖాతాల జాబితాను సమర్పించింది. అంతర్జాతీయ న్యాయవాద గ్రూప్ ఫ్రీడమ్ హౌస్, జర్నలిస్టులు, రాజకీయ నాయకులు, రైతుల నిరసన మద్దతుదారుల నుంచి బహుళ ఖాతాలు, కొన్ని ట్వీట్లను బ్లాక్ చేయాలని ప్రభుత్వం ట్విట్టర్‌ను కోరింది.