లీనా మణిమేకలై‌కు మద్దతుగా తృణమూల్ కాంగ్రెస్ ఎంపీ

ఓ చిత్రానికి చెందిన కాళీ పోస్టర్ పై తాజాగా దేశంలో పెద్ద వివాదం సాగుతోంది. హిందూవుల మనోభావాలను చిత్ర దర్శకురాలు గాయపరిచారని పలు చోట్లు కేసులు పెట్టారు. తాజాగా వివాదంపై తృణమూల్ కాంగ్రెస్ ఎంపీ మహువా మోయిత్రా స్పందించారు. ఆ డాక్యుమెంటరీ ఫిల్మ్ దర్శకురాలు లీనా మణిమేకలై‌కు ఆమె మద్దతుగా నిలిచారు. ఓ మీడియా కార్యక్రమంలో మోయిత్రా మాట్లాడుతూ తనకు సంబంధించినంత వరకు కాళీ మాంసాహారం, మద్యం స్వీకరించే దేవతే అని ఆమె అన్నారు. "మీ దేవతను ఊహించుకునే స్వేచ్ఛ మీకు ఉంది. నాకు కాళీ మాంసాహారం, మద్యం స్వీకరించే దేవత. కొన్ని ప్రదేశాల్లో మద్యాన్ని దేవతలకు నైవేద్యంగా పెడతారు. కానీ అది ఇతర ప్రదేశాల్లో దైవదూషణ అవుతుంది." అని మోయిత్రా అన్నారు.

ఈ కాళీ ఫిల్మ్ పోస్టర్‌ను లీనా ట్విట్టర్‌లో పోస్ట్ చేశారు. ఈ పోస్టర్‌‌లో కాళీమాత వేషదారణలో ఉన్న నటి ఒక చేత్తో త్రిశూలం ప‌ట్టుకుని మ‌రో చేత్తో సిగరెట్ తాగుతున్నట్టు ఉంది. అలాగే ఎల్జీబీటీ జెండాను కూడా మరో చేత్తో పట్టుకున్నట్టు పోస్టర్‌ని డిజైన్ చేశారు. ఇటీవల విడుదల చేసిన ఈ పోస్టర్ క్షణాల్లో వైరల్ అయింది. ఒక దేవతను ఆ విధంగా చూపించడంపై నెటిజన్లు ఆగ్రహం వ్యక్తం చేశారు. హిందువుల మనోభావాలను దెబ్బతీశారని ఆరోపిస్తూ.. హిందూ సంఘాలు మండిపడ్డారు. సోషల్ మీడియాలో దర్శకాలకు లీనాపై తీవ్ర స్థాయిలో ట్రోల్ చేయడం ప్రారంభించారు. ట్విట్టర్‌లో #arrestleenamanimekalai అనే హ్యాష్ ట్యాగ్‌ను ట్రెండ్ చేయడం మొదలుపెట్టారు.

ఆమెకు వ్యతిరేకంగా యూపీలో ఓ కేసు కూడా నమోదైంది. ఆ చిత్రానికి పనిచేసిన మరో ఇద్దరిపై నేరపూరిత కుట్ర, ఉద్దేశపూర్వకంగా మతపరమైన మనోభావాలను దెబ్బతీయడం, శాంతికి విఘాతం కలిగించే ఉద్దేశం వంటి ఆరోపణలతో ఎఫ్‌ఐఆర్ నమోదు చేశారు. అయితే తమిళనాడుకు చెందిన మణిమేకలై తన పోస్టర్‌ను పూర్తిగా సమర్థించుకున్నారు. "నేను కోల్పోయేది ఏమీ లేదు. నేను జీవించి ఉన్నంత వరకు, నేను నమ్మినదాన్ని నిర్భయంగా మాట్లాడే గొంతుతో జీవించాలనుకుంటున్నాను. దానికి మూల్యం నా ప్రాణమైతే, అది ఇస్తాను." అని ఆమె ట్వీట్ చేశారు.