నిరసనలు ఇలా కూడా తెలపవచ్చు అటా

నిరసనలు చేస్తే పోలీసుల లాఠీ ఛార్జ్ లు...అరెస్ట్ లు ఇది మన ఎక్కడ చూసిన కనిపించే ఘటనలు. కానీ నిరసనలు శాంతియుతంగానే కాదు ఎంజాయ్ చేస్తూ కూడా చేపట్టవచ్చని మధ్యప్రదేశ్ కు చెందిన ఓ గ్రామ వాసులు తమ చర్యలతో నిరూపించారు. నిరసనంటే ఎక్కడైనా ధర్నాలు, దీక్షలు చేస్తారు. మధ్యప్రదేశ్‌లో మాత్రం ఎవరూ ఊహించని విధంగా నిరసన తెలియజేశారు. తమ వినూత్న నిరసనతో అందరి దృష్టిని ఆకర్షించారు. ఓ గుంతనే బీచ్‌గా మార్చేసి.. అందులో కుర్చీలేసుకుని పార్టీ చేసుకున్నారు. అదే నిరసన. అసలేం జరిగిందంటే మధ్యప్రదేశ్‌లో ఓ గ్రామంలో రోడ్డు గుంతలమయమైంది. భారీ వర్షాలకు ఆ గుంతలో నీళ్లు వచ్చి చేరాయి. దాంతో గ్రామస్థులు ఆ గుంతనే గోవా బీచ్‌గా మార్చేశారు. అందులో కుర్చీలు వేసుకుని పార్టీ చేసుకున్నారు. ఈ వీడియో నెట్టింట వైర‌ల్‌గా మారింది.

ఈ ఘటన అనుప్పూర్ గ్రామంలో చోటుచేసుకుంది. వర్షాల కారణంగా రోడ్డుపై పెద్ద గుంత ఏర్ప‌డి నీళ్లు నిలిచిపోయాయి. ఆ సమస్య గురించి అందరికి తెలియాలనుకున్నారు. దాంతో కొంద‌రు ఆ గుంత దగ్గర కుర్చీలు ఏర్పాటు చేశారు. కలర్‌ఫుల్ టీ షర్టులు, టోపీలు, క‌ళ్ల‌ జోళ్లు ధరించి.. ఆ ప్రదేశంలో గోవా బీచ్‌ స్టైల్‌‌ లుక్‌ను తీసుకొచ్చారు. అక్కడ కొంద‌రు మ్యూజిక్ వింటూ.. మ‌రికొంద‌రు చేతుల్లో లిక్క‌ర్ బాటిల్స్ ప‌ట్టుకుని ఒక‌రిపై ఒక‌రు జోకులు వేసుకుంటూ పార్టీ చేసుకున్నారు. మరికొందరు పాట‌లు పాడుతూ డ్యాన్స్ చేశారు.

దీనికి సంబంధించిన వీడియోను ఒక జర్నలిస్ట్ సోషల్ మీడియాలో షేర్ చేశారు. వ్యంగ్యంగా ఓ క్యాప్షన్ కూడా పెట్టారు. వీడియోను పోస్ట్ చేస్తూ.. "మీరు ఉల్లాసమైన వ్యక్తి అయితే, దేవుడు తప్ప మిమ్మల్ని ఎవరూ ఇబ్బంది పెట్టలేరు. మున్సిపల్ కార్పొరేషన్ లేదా ప్రభుత్వాన్ని తిట్టడం మానేయండి. జీవితాన్ని ఆస్వాదించండి. మధ్యప్రదేశ్ ప్రజలు రోడ్డు గుంతను ఇలా బీచ్‌గా మార్చి తమ ప్రతిభను కనబరిచారు." అని రాసుకొచ్చారు. మరొకరు పాజిటివ్ థింకింగ్ ఉన్న వ్యక్తులకు జీవితం ఒక పెద్ద పార్టీ అని కామెంట్ పెట్టారు.