ప్రేమ పెళ్లికి లంచమడిగి...అడ్డంగా బుక్కయ్యాడు
Andhra Pradesh Telugu | Suryaa Desk | Published : Fri, Jul 08, 2022, 03:24 AM
లంచమివ్వనిదే పెళ్లి జరగనివ్వను అన్నాడో ఎస్పై...రూ.10వేల చెల్లించాకే పెళ్లి తంతుకానిచ్చాడు. ప్రేమ పెళ్లి చేసుకున్న జంటలు.. రక్షణ కోసం పోలీసు స్టేషన్లకు వెళ్లడం.. పోలీసులు ఇరువైపుల వారిని పిలిచి మాట్లాడటం మామూలే. కర్నూలు జిల్లాకు చెందిన యువతీ యువకులు ప్రేమించుకోగా.. వారి పెళ్లికి అబ్బాయి తరఫువారు అంగీకరించలేదు. దీంతో అమ్మాయి తరఫు వారు స్థానిక ఎస్సైను ఆశ్రయించారు. ప్రేమ పెళ్లికి సహకరించిన ఎస్సై.. అందుకు రూ.50 వేలు లంచం డిమాండ్ చేశాడు. చివరికి ఎంపీటీసీ సమక్షంలో రూ.40 వేలకు డీల్ కుదరగా ముందుగా రూ.10 వేలు యూపీఐ ద్వారా తన ఖాతాలోకి వేయించుకున్నాడు. తర్వాత మిగతా డబ్బుల కోసం ఒత్తిడి చేశాడు. దీంతో బాధితులు ఏసీబీని ఆశ్రయించారు. కర్నూలు జిల్లా మద్దికెరకు చెందిన క్రాంతి, ప్రీతిలు ఒకే సామాజిక వర్గానికి చెందిన వారు. చాలా కాలంపాటు ప్రేమించుకున్న వీరు ఇటీవలే పెళ్లి చేసుకోవాలని భావించారు. దీనికి అమ్మాయి తల్లిదండ్రులు అంగీకరించారు కానీ అబ్బాయి తల్లిదండ్రులు మాత్రం ఒప్పుకోలేదు. దీంతో అమ్మాయి తరఫు వారు తుగ్గలి పోలీసులను ఆశ్రయించారు. విషయం తెలుసుకున్న ఎస్సై సమీర్ బాషా... డబ్బులు డిమాండ్ చేశాడు. పదివేలు తనకు ట్రాన్స్ఫర్ చేశాక గానీ అతడు పెళ్లి చేసుకోనీయలేదు. ఆ తర్వాత మిగతా డబ్బుల కోసం ఫోన్ చేస్తుండటంతో బాధితులు ఏసీబీని ఆశ్రయించారు. ఎస్సై డబ్బులు తీసుకున్నట్లు కాల్ రికార్డింగ్స్, ఆన్లైన్ ట్రాన్సాక్షన్లు సాక్ష్యంగా ఉండటంతో.. ఎస్సైపై చర్యలు తీసుకునే అవకాశం ఉంది.
|
|