తన ఉద్యోగుల కోస్ం...‘మూన్‌లైటింగ్ పాలసీ’ తీసుకొచ్చిన స్విగ్గీ

చాలీచాలని జీతాలతో నెట్టుకొస్తున్న తన సిబ్బంది కోసం స్విగ్గీ కొత్త విధానం అమలులోకి తీసుకొచ్చింది.  ఫుడ్ డెలివరీ ప్లాట్‌ఫామ్ స్విగ్గీ ఇండస్ట్రీలోనే తొలిసారి తన ఉద్యోగుల కోసం ‘మూన్‌లైటింగ్ పాలసీ’ని తీసుకొచ్చింది. ఈ పాలసీ కింద కంపెనీ అనుమతితో.. ఎక్స్‌టర్నల్ ప్రాజెక్టులు తీసుకోవచ్చు. ఆఫీసు అవర్స్ అయిపోయిన తర్వాత లేదా వీకెండ్లలో కంపెనీకి వెలుపల పనిచేసుకుని కాస్త ఎక్కువగా సంపాదించుకునే అవకాశాన్ని స్విగ్గీ తన ఉద్యోగులకు కల్పిస్తోంది. అయితే స్విగ్గీ చేసే ఫుల్ టైమ్‌ జాబ్‌ ప్రొడక్టివిటీపై దీని ప్రభావం ఉండకూడదు. అంతేకాక స్విగ్గీ వ్యాపార ప్రయోజనాలకు ఎలాంటి ఇబ్బందులు రాకూడదు.

కరోనా లాక్‌డౌన్‌ల సమయంలో.. చాలా మంది కొత్త కొత్త అంశాల పట్ల ఆసక్తి చూపారు. ఎన్నో కొత్త విషయాలను నేర్చుకున్నారు. వాటిని ఇప్పుడు అదనపు ఆదాయ వనరుగా మార్చుకోవచ్చని స్విగ్గీ చెబుతోంది. ఎన్‌జీవోకి వాలంటీర్‌గా పనిచేయడం లేదా డ్యాన్స్ నేర్పడం లేదా సోషల్ మీడియా మీడియా కోసం కంటెంట్ క్రియేట్ చేయడం వంటి వాటికి పనిచేసుకోవచ్చని చెబుతోంది. కంపెనీ ఫుల్ టైమ్ ఉపాధికి వెలుపల ఈ ప్రాజెక్టులలో పనిచేయడం వల్ల ఉద్యోగులు వృత్తిపరంగా, వ్యక్తిగతంగా అభివృద్ధి సాధిస్తారని కంపెనీ భావిస్తోంది.

ఉద్యోగులకు అనుగుణంగా ఎప్పటికప్పుడు తాము సంస్థాగత విధానాలను తీసుకొస్తామని స్విగ్గీ హ్యుమన్ రిసోర్స్ హెడ్ గిరీష్ మీనన్ తెలిపారు. మూన్‌లైటింగ్ పాలసీతో.. తమ వద్ద ఫుల్ టైమ్ ఉద్యోగం చేస్తూనే ఎలాంటి అడ్డంకులు లేకుండా.. తమ అభిరుచులను నెరవేర్చుకునేలా ఉద్యోగులను ప్రోత్సహించనున్నామని చెప్పారు. అత్యాధునిక పీపుల్ ఫస్ట్ ఆర్గనైజేషన్‌గా తాము రూపాంతరం చెందే పయనంలో ఇది మరో అడుగని పేర్కొన్నారు. అయితే ఈ పాలసీ ఉద్యోగుల కోసం మార్గదర్శకాలను రూపొందించింది. మూన్‌లైటింగ్ ప్రాజెక్టులు చేసేటప్పుడు ఈ మార్గదర్శకాలకు తప్పనిసరిగా కట్టుబడి ఉండాలి. స్విగ్గీ సంస్థ ఇటీవలే తన ఉద్యోగులకు మరో బంపర్ ఆఫర్ ప్రకటించిన సంగతి తెలిసిందే. ఫ్యూచర్ వర్క్ పాలసీలో భాగంగా ఉద్యోగులు శాశ్వతంగా ఎక్కడి నుంచైనా పని చేసుకునే వెసులుబాటును కల్పించింది. కార్పొరేట్, సెంట్రల్ బిజినెస్, టెక్నాలజీ టీమ్‌లు రిమోట్‌గా పనిచేస్తూ ఉండొచ్చని తెలిపింది.