ఎండ వేడిమి తట్టుకోలేక..సోమసిల్లిన గుర్రం

అమెరికాలో ఎండలు ఎంత తీవ్రంగా ఉన్నాయో ఇటీవల చోటు చేసుకొన్న ఓ ఘటన స్పష్టంచేస్తోంది. రోడ్డుపై చకచకా బండిని లాగుతున్న గుర్రం సడన్‌గా పడిపోయింది. ఉన్నట్టుండి సొమ్మసిల్లి కుప్పకూలిపోయింది. అసలేం జరిగిందో అక్కడున్నవారికి తెలియలేదు. ఆ మూగ జీవి అసలెందుకు అలా పడిపోయిందనేది ఎవరికీ అర్థం కాలేదు. బండి నడుపుతున్న వ్యక్తితో సహా అందరూ గందరగోళంలో పడ్డారు. అమెరికాలోని న్యూయార్క్‌లో బుధవారం ఈ సంఘటన చోటుచేసుకుంది.

మాన్‌హట్టన్ హెల్స్ కిచెన్ ప్రాంతంలోని కూడలి దగ్గర క్యారేజ్ లాగుతున్న రైడర్ అనే గుర్రం ఉన్నట్టుండి కుప్పకూలిపోయింది. దానిని పైకి లేపేందుకు బండి నడుపుతున్న వ్యక్తి ప్రయత్నించాడు. కానీ అది లేవలేదు. దాంతో బండి నడిపే వ్యక్తి, స్థానికులు పోలీసులకు సమాచారం ఇచ్చారు. న్యూయార్క్ పోలీస్ డిపార్ట్‌మెంట్‌కు చెందిన అశ్వదళం అక్కడకు చేరుకుని విషయం తెలుసుకున్నారు. ఎండ వేడిమి తట్టుకోలేక.. గుర్రం పడిపోయినట్టు గుర్తించారు. దానికి వెంటనే సపర్యలు చేయడం మొదలుపెట్టారు.

ముందుగా పైపులతో నీటిని గుర్రంపై జల్లారు. వేడితో సతమతమవుతున్న గుర్రం శరీరాన్ని చల్లబరిచారు. అలా చేసినా గంట తర్వాత గుర్రం పైకి లేచింది. కొంచెం కోలుకున్న గుర్రాన్ని పోలీసులు ప్రత్యేక గుర్రపు శాలకు తరలించి.. వైద్యులతో చికిత్స అందిస్తున్నారు. అయితే దీనికి సంబంధించిన సోషల్ మీడియాలో వైరల్ అయింది. ఆ వీడియో చూసిన జంతు ప్రేమికులు గుర్రంబండి నిర్వాహకులపై మండిపడుతున్నారు. వాహనాలతో రద్దీగా ఉండే రోడ్లపై గుర్రం బండిని వినియోగించడాన్ని తప్పుబడుతున్నారు. మూగ జీవాన్ని కష్టపెట్టే గుర్రం బండ్లను నిషేధించాలని డిమాండ్ చేస్తున్నారు.