మధ్యప్రదేశ్‌లో రోడ్డుపైకి వచ్చిన మొసళ్లు...జనం బెంబేలు

భారీ వర్షాలకు రోడ్లు..చెరువులు ఒకటయ్యాయి...అంతేకాదు చెరువు, నదుల్లో ఉండాల్సిన మొసళ్లు తాజాగా మధ్య ప్రదేశ్ రాష్ట్రంలో జనసంచారమున్న కాలనీలోకి వచ్చేశాయి. దీంతో జనం బెంబేలెత్తారు. సాధారణంగా  మొసళ్లు చెరువుల్లో, నదుల్లో ఉంటాయి. అయితే ఓ మొసలి దారి తప్పి ఏకంగా కాలనీలోకి వచ్చేసింది. దానిని చూసిన వారంతా ఒక్కసారిగా హడలిపోయారు. ఇదేం విడ్డూరం అనుకుంటున్నారా..? ఇదెలా సాధ్యం అనుకుంటున్నారా..? కానీ నిజం మధ్యప్రదేశ్‌లోని ఓ నివాస కాలనీలో మొసలి సంచరించింది. భారీ వర్షాల పుణ్యమా అని ఈ వినూత్నమైన ఘటన చోటుచేసుకుంది.

మధ్యప్రదేశ్‌లో శివపురి జిల్లాలో శనివారం రాత్రి నుంచి భారీ వర్షాలు కురుస్తున్నాయి. దాంతో రహదారులన్నీ చెరువులను తలపించాయి. కాలనీలు కూడా జలమయం అయ్యాయి. అలా ఓ కాలనీలో చేరుకున్న నీళ్లలో ఓ మొసలి సంచరించింది. దానిని చూసిన స్థానికుల గుండె జారినంత పనైంది. అయితే చాలామంది దానిని వీడియోలో బంధించారు. అయితే మొసలి గురించి స్థానిక అధికారులకు తెలియజేశారు. ఒక గంట పాటు కష్టపడి దానిని అధికారులు పట్టుకున్నారు. తెల్లవారుజామున పాత బస్టాండ్ సమీపంలోని ఓ కాలనీలో మొసలి కనిపించిందని అధికారులకు సమాచారం అందించామని సబ్ డివిజనల్ పోలీసు అధికారి (ఎస్డీఓపీ) అజయ్ భార్గవ తెలిపారు.

మాధవ్ నేషనల్ పార్క్ నుంచి రెస్క్యూ టీమ్‌ను పిలిపించి గంటపాటు శ్రమించి మొసలిని బంధించామని, ఎనిమిది అడుగుల పొడవున్న ఆ మొసలిని సాంఖ్యసాగర్ సరస్సులో విడిచిపెట్టామని అధికారులు చెప్పారు. అయితే దీనికి సంబంధించిన వీడియో సోషల్ మీడియాలో ప్రత్యక్షమైంది. రెసిడెన్షియల్ కాలనీలోని ఇరుకైన సందులో ఉన్న ఓ ఇంటి ముందు నుంచి మొసలి వెళ్తున్న దృశ్యాన్ని అందులో చూడొచ్చు. కాగా అక్కడ ఏకధాటిగా కురుస్తున్న వర్షాలకు కలెక్టర్ ముందస్తు అనుమతి లేకుండా ఉద్యోగులను ప్రధాన కార్యాలయం నుంచి బయటకు రావద్దని జిల్లా యంత్రాంగం ఆదేశించింది.