ఉక్రెయిన్ దాడికి...ఏడు రష్యా యుద్ద విమానాల విధ్వంసం

ఉక్రెయిన్ పై రష్యా దాడులకు తెగబడుతున్నా...అప్పుడప్పుడు రష్యాపై కూడా ఉక్రెయిన్ పై చెయ్యి సాధిస్తోంది. తాజాగా  క్రిమియాలోని రష్యా వైమానిక స్థావరంలో మంగళవారం భారీ విస్ఫోటనం సంభవించింది. ఈ పేలుడులో కనీసం ఏడు యుద్ధ విమానాలు ధ్వంసమయ్యాయి. ఇది ప్రమాదవశాత్తూ జరిగిందని రష్యా వివరణ ఇస్తున్నా.. తాజాగా బయటకు వచ్చిన ఉపగ్రహ చిత్రాలను బట్టి నిపుణులు మాత్రం ఉక్రెయిన్ దళాల దాడిగా భావిస్తున్నారు. అక్కడ పరిస్థితి చూస్తే క్షిపణి దాడిగా అనుమానిస్తున్నారు. ‘‘అది ప్రమాదవశాత్తూ జరిగితే నలుగురు ఐదుగురు వ్యక్తులు ఒకే స్థలంలో సిగరెట్‌లు విసరడం లేదా సుత్తితో బాంబులు కొట్టడం వంటివి నమ్మశక్యంకాని అవకాశంగా ఉంది’’ అని అంతర్జాతీయ విశ్లేషకుడు ఓలీవర్ అలెగ్జాండర్ అన్నారు.

రెండో ప్రపంచ యుద్ధం తర్వాత ఒకే రోజు రష్యాకు చెందిన తొమ్మిది యుద్ధ విమానాలు ధ్వంసం కావడం ఇదే మొదటిసారి. ధ్వంసమైన యుద్ధ విమానాలను ఎస్‌యూ-24 బాంబర్లు, ఎస్‌యూ-30 యుద్ధ విమానాలుగా భావిస్తున్నట్టు ఆస్ట్రేలియా వైమానికదళ మాజీ పైలట్, గ్రిఫ్టిత్ ఆసియా ఇన్‌స్టిట్యూట్ రిసెర్చర్ పీటరల్ లేటన్ అన్నారు.

మరోవైపు, తమదేశంపై దండయాత్ర ప్రారంభమైన ఫిబ్రవరి నుంచి ఇప్పటి వరకూ ధ్వంసమైన రష్యా యుద్ధ విమానాల జాబితాలో మరో తొమ్మిది తాజాగా చేరాయని ఉక్రెయిన్ సైనిక దళాలు బుధవారం ప్రకటించాయి. ఇన్‌స్టిట్యూట్ ఫర్ ది స్టడీ ఆఫ్ వార్ థింక్ ట్యాంక్ ప్రకారం.. క్రిమియాలో ఉన్న రష్యా ఎయిర్ బేస్ వద్ద పేలుళ్లకు కారణాన్ని గుర్తించలేమని ఉక్రేనియన్ రక్షణ మంత్రిత్వ శాఖ తెలిపింది. కాగా, ఏవియేషన్ మందుగుండు సామాగ్రి కారణంగా పేలుళ్లు సంభవించాయని రష్యా రక్షణ మంత్రిత్వ శాఖ తెలిపింది. కానీ, ఎలా పేలిపోయాయనేది మాత్రం చెప్పలేదు.

యుద్ధం మొదలైన తర్వాత ఏప్రిల్ రెండో వారంలో రష్యా యుద్ద నౌక మాస్క్వా ఉక్రెయిన్ మెరుపుదాడికి ధ్వంసం చేసిన విషయం తెలిసిందే. నెప్ట్యూన్ క్షిపణులతో ఉక్రెయిన్ విరుచుకుపడి యుద్ధ నౌకను ముంచేసింది. తొలుత దాడిలో దెబ్బతినడంతో నౌకను ఒడ్డుకు చేర్చేందుకు రష్యా నౌకాదళం ప్రయత్నించింది. ఈ క్రమంలో ఒడ్డుకు తరలిస్తున్న సమయంలో పట్టుకోల్పోయి నౌక నీట మునిగినట్లు రష్యా అధికారిక వార్త సంస్థ టాస్‌ వెల్లడించింది. అయితే, ఉక్రెయిన్ దాడి వల్ల నౌక ధ్వంసమైందని చెబితే పరువు పోతుందనే భయంతో బయటకు మాత్రం అంతర్గతంగా జరిగిన పేలుడు వల్లే నౌకలో ప్రమాదం జరిగిందని రష్యా ప్రకటించడం గమనార్హం.