‘డ్యూడ్’ రివ్యూ – మాస్ టచ్‌తో కొత్త కాన్సెప్ట్!

తమిళ నటుడు ప్రదీప్ రంగనాధన్, ‘లవ్ టుడే’, ‘డ్రాగన్’ వంటి చిత్రాలతో తెలుగు ప్రేక్షకులను ఆకట్టుకున్నాడు. ఇప్పుడు ఆయన మూడోసారి ‘డ్యూడ్’ సినిమాతో ప్రేక్షకుల ముందుకు వచ్చాడు. ఈ చిత్రంలో మమితా బైజు హీరోయిన్‌గా నటించగా, మైత్రీ మూవీస్ ఈ సినిమాను తెలుగు రాష్ట్రాల్లో భారీగా ప్రమోట్ చేసింది. డబ్బింగ్ సినిమా అన్న భావన రాకుండా, నేరుగా తెలుగు ప్రేక్షకుల కోసం తెరకెక్కించినట్టుగా ప్రచారం జరిగింది. ఈ అంచనాలపై సినిమా ఎంతవరకు నిలబడిందో చూద్దాం.పశుసంవర్ధక శాఖ మంత్రి ఆది కేశవులు (శరత్‌కుమార్) మేనల్లుడు గగన్ (ప్రదీప్ రంగనాధన్) ఓ లవ్ ఫెయిల్యూర్ యువకుడు. ఆది కేశవులు తన మేనల్లుడిని ఎంతో ఇష్టపడతాడు. ఆయన కూతురు కుందన చిన్నప్పటి నుంచే గగన్‌ని ప్రేమిస్తుంది. అయితే, గత ప్రేమ వైఫల్యంతో గగన్ కుందన ప్రేమను అంగీకరించడు. కానీ కొంతకాలానికి గగన్‌కూ కుందన్‌పై ప్రేమ పుడుతుంది. మామయ్య దగ్గరకు వెళ్లి పెళ్లి విషయం చెబుతాడు. ఆది కేశవులు కూడా సంతోషంగా ఒప్పుకుంటాడు. కానీ పెళ్లి తర్వాత కథలో ఊహించని మలుపులు వస్తాయి. కుందన్ ప్రవర్తన మారిపోతుంది. గగన్ ఓ త్యాగం చేయాల్సిన పరిస్థితి ఎదుర్కొంటాడు. ఆ త్యాగం ఏమిటి? కుందన్ ఎందుకు మారింది? అనే అంశాల చుట్టూ కథ సాగుతుంది.ప్రదీప్ రంగనాధన్ తన కామెడీ టైమింగ్‌తో ప్రేక్షకులను ఆకట్టుకున్నాడు. అయితే కథలో కొత్తదనం లేకపోవడం వల్ల కొంత ఇంపాక్ట్ తగ్గింది. మమితా బైజు పాత్రలో బాగా నటించినా, ఆమె పాత్రకు మరింత లోతు ఉంటే బాగుండేదనిపిస్తుంది. శరత్‌కుమార్ పాత్ర సినిమాలో పెద్ద సర్‌ప్రైజ్‌గా నిలిచింది. ఆయన ఎంటర్‌టైనింగ్ టచ్ సినిమాకు బలం ఇచ్చింది. నేహా శెట్టి చిన్న పాత్రలో కనిపించి ఆకట్టుకుంది.దర్శకుడు కీర్తీశ్వరన్ సినిమాను స్టైలిష్ యాంగిల్‌లో రూపొందించాడు. ఎమోషనల్ సన్నివేశాలు బాగా కుదిరాయి. అయితే కథనం మధ్యలో రొటీన్ ఫార్మాట్‌లోకి వెళ్లడం వల్ల పేస్ తగ్గింది. ఎడిటింగ్ కొంత కుదించి ఉంటే సినిమా మరింత క్రిస్ప్‌గా ఉండేది. బ్యాక్‌గ్రౌండ్ స్కోర్, సినిమాటోగ్రఫీ రెండూ సంతృప్తికరంగా ఉన్నాయి. మైత్రీ మూవీస్ ప్రొడక్షన్ విలువలు మాత్రం అద్భుతంగా ఉన్నాయి.మొత్తం మీద ‘డ్యూడ్’ పేరు ఎంత అట్టహాసంగా ఉన్నా, సినిమా మాత్రం అంత ప్రభావం చూపించలేకపోయింది. అయినప్పటికీ, స్టైలిష్ ప్రెజెంటేషన్‌ మరియు యూత్‌ఫుల్ టచ్‌తో కూడిన ఓ మోస్తరు ఎంటర్‌టైనర్‌గా నిలిచింది.