ఆమెను నిజాయతీగా ప్రేమించాను: సుశాంత్

అమ్మాయిల సంగతి ఎలా ఉన్నా.. అబ్బాయిలకు మాత్రం ఫస్ట్ క్రష్ కానీ ఫస్ట్ లవ్ కానీ స్కూల్ టీచర్‌పై ఉండి ఉంటుంది. ఫలానా టీచర్ అందంగా కనిపిస్తే చాలు ఆమె కోసమైనా ఒక్క రోజు కూడా క్లాస్ ఎగ్గొట్టకుండా వెళ్లిన విద్యార్థులు ఉండకపోరు. బాలీవుడ్ నటుడు సుశాంత్ సింగ్ రాజ్‌పుత్ కూడా ఈ కోవకు చెందిన కుర్రాడేనట. ఆయన కెరీర్ మొదలుపెట్టిన ఆరేళ్లలో సారా అలీ ఖాన్, కృతి సనన్, రియా చక్రవర్తిలతో డేటింగ్‌ చేశాడని ఎన్నో వార్తలు వచ్చాయి. కానీ తాను మాత్రం వారెవ్వరినీ ప్రేమించలేదని ఇండియా టుడే మైండ్ రాక్స్ దిల్లీ అనే ఈవెంట్‌లో వెల్లడించారు. ‘నేను నాలుగో తరగతిలో ఉన్నప్పుడే నిజమైన ప్రేమను చూశాను. ఓ టీచర్‌‌ను చాలా నిజాయతీగా ప్రేమించాను. కానీ నేను ఆమెకు ఆ విషయాన్ని చెప్పలేకపోయాను. ఎందుకంటే పరీక్షల్లో ఫెయిల్ అయిపోతానేమోనని భయం. ఆ తర్వాత పరీక్షలు పూర్తయ్యాక కూడా ఈ విషయాన్ని ఆమెకు చెప్పలేకపోయాను. అంతేకాదు నేను నా జీవితంలో ఇప్పటివరకు ఎవ్వరికీ ఐ లవ్యూ అని చెప్పింది లేదు. నేను తొమ్మిదో తరగతి చదువుతున్నప్పుడు నాకు ఫస్ట్ ప్రపోజల్ వచ్చింది. ఆ తర్వాత కాలేజ్‌కి వెళ్లాక నా ఇంజినీరింగ్ ఫ్రెండ్స్‌కి క్లాసెస్ చెప్పేవాడిని. వారి నుంచి డబ్బులు కూడా తీసుకునేవాడిని. వచ్చిన డబ్బుతో బైక్ కొనుక్కున్నాను. ఆ తర్వాత ఒక అమ్మాయితో డేట్‌కి వెళ్లాను. తనను నా బైక్ ఎక్కించుకుని పరోటాలు తినిపించడానికి తీసుకువెళ్లాను’ అని వెల్లడించారు సుశాంత్. అయితే ఇక్కడ ఒక విషయంలో సుశాంత్ దొరికిపోయాడు. ఆయన తన కెరీర్‌లో ‘పవిత్ర రిష్తా’ అనే హిందీ సీరియల్‌తో ప్రారంభించారు. ఇందులో బాలీవుడ్ నటి అంకితా లోఖాండే ఆయనకు భార్య పాత్రను పోషించారు. ఆ తర్వాత వీరిద్దరి మధ్య ప్రేమ పుట్టి కొంతకాలం డేటింగ్ చేశారు. తాను ప్రేమలో ఉన్నానని సుశాంత్ కూడా అప్పట్లో ఒప్పుకొన్నాడు. ఆ తర్వాత సుశాంత్ సినిమాల్లోకి వచ్చేశాడు. దాంతో ఇద్దరి మధ్య మనస్పర్ధలు వచ్చి విడిపోయారు. అయితే అంకితతో ప్రేమలో ఉన్నానని చెప్పిన సుశాంత్ తన జీవితంలో ఎవ్వరికీ ఐ లవ్యూ చెప్పలేదని అంటున్నారు. ఐ లవ్యూ చెప్పకుండా అంకితతో ఎలా డేటింగ్ చేశారో ఆయనకే తెలియాలి. సుశాంత్ నటించిన ‘చిచ్ఛోరే’ చిత్రం ఇటీవల విడులైంది. శ్రద్ధా కపూర్ కథానాయికగా నటించిన ఈ చిత్రం బాక్సాఫీస్ వద్ద మంచి వసూళ్లు రాబట్టింది. నితేశ్ తివారీ దర్శకత్వం వహించిన ఈ సినిమా రూ.100 కోట్ల క్లబ్‌లో చేరింది. మరోపక్క సుశాంత్ నటించిన ‘డ్రైవ్’ సినిమా థియేటర్‌లో విడుదలకు నోచుకోవడంలేదు. ఈ సినిమాను నెట్‌ఫ్లిక్స్‌లో విడుదల చేయాలని నిర్ణయించుకున్నారు.