నయన్ను లేడీ సూపర్స్టార్ అనొద్దు
cinema | Suryaa Desk | Published : Mon, Nov 27, 2017, 09:30 AM
‘అరం’ చిత్రంతో నయనతార క్రేజీ మరింత పెరిగిందనే చెప్పాలి. ఇప్పుడామెను అభిమానులు, పరిశ్రమలోని పలువురు ‘లేడీ సూపర్స్టార్’ అనే ప్రశంసిస్తున్నారు. సమాజంపై అక్కరతో ఇలాంటి మంచి సినిమాలు కూడా చేస్తున్నారని కొనియాడుతున్నారు. అంతేకాకుండా ఇటీవల ఆమె పుట్టినరోజున సామాజిక మాధ్యమాల్లో ‘లేడీ సూపర్స్టార్కు పుట్టినరోజు శుభాకాంక్షలు’ అన్న నినాదాలే ఎక్కువ కనిపించాయి. అయితే ‘లేడీ సూపర్స్టార్’ అనే భారాన్ని నయనతారపై మోపకండని నటి లక్ష్మీరామకృష్ణన్ కోరారు. ఈ విషయమై ఆమె మాట్లాడుతూ ‘అరం’ చిత్రాన్ని చూశా.
నయనతార పాత్ర బాగా నచ్చింది. సినిమాటోగ్రఫి, సంగీతం అద్భుతం. చీరలో నయనతార మరింత అందంగా కనిపించారు. ఓ ప్రేక్షకురాలిగా ఈ సినిమాలో రెండు విషయాలు నచ్చలేదు. నిజానికి ఇందులో కథానాయకుడు.. బోరు బావిలో పడిపోయిన చిన్నారి అన్న. కానీ అతన్ని చివర్లో పెద్దగా పట్టించుకోలేదు. ఇక చిన్నారిని రక్షించిన తర్వాత ఆమెకు ప్రాథమిక చికిత్స అందించాలి. కానీ కలెక్టర్ కాళ్లపై పడాల్సిన అవసరం లేదు. ఇక మీడియాకు ఓ చిన్న విన్నపం. లేడీ సూపర్స్టార్ అనే భారాన్ని నయన్కు ఇవ్వకండి. ఆమెలోని మరింత ఎక్కువ ప్రతిభను మేం చూడాలనుకుంటున్నాం. సూపర్స్టార్ పురస్కారాన్ని ఇచ్చేస్తే.. ఆమె అందుకు తగిన కథలనే ఎంచుకోవాల్సిన నిర్బంధ పరిస్థితికి వస్తారు. మన తల్లిదండ్రుల కాళ్లపై మాత్రమే మనం పడాలి. ఇతరుల కాళ్లపై పడే అలవాటును విడనాడాలని పేర్కొన్నారు.
|
|