గోల్కొండలో మానుషి స్పెషల్ అట్రాక్షన్

హైదరాబాద్: మిస్ వరల్డ్ మానుషీ చిల్లర్ బుధవారం గ్లోబల్ ఎంటర్‌ప్రెన్యూయర్‌షిప్ సమ్మిట్‌లో పాల్గొన్నారు. ఈ సందర్భంగా ఆమె మాట్లాడారు. లక్ష్యం ఏదైనా దానిని సాకారం చేసుకోవడానికి కృషి చేయాలని, ప్రతి ఒక్కరు కలలు కనాలని, వాటి దిశగా అడుగులు వేయాలని చెప్పారు. సమాజం కోసం, బాలిక విద్య, వైద్యం కోసం తన వంతు కృషి చేస్తానన్నారు.సమాజం ప్రతి ఒక్కరికి ఎంతో కొంత నేర్పుతుందని, ఆ సమాజానికి మనం కూడా ఇచ్చేందుకు ఆలోచన చేయాలని, ఇందులో పారిశ్రామికవేత్తలు భాగస్వాములు కావాలని విజ్ఞప్తి చేశారు.

పరిశుభ్రత అనేది వ్యక్తిగతంగానే కాకుండా సమాజపరంగా కూడా ఉండాలన్నారు.సినిమాల్లో నటించడమన్నది చాలా ఆసక్తికర విషయమని మానుషీ చిల్లర్ తెలిపారు. కానీ, ప్రస్తుతానికి తన ప్రాధాన్యం అది కాదని చెప్పారు. అసలు సినిమా అవకాశాల గురించి ఆలోచించడం లేదని తెలిపారు. డాక్టర్‌గా కొనాసాగాలనేది తన కోరిక అని చెప్పారు. ఇంకా చెప్పాలంటే డాక్టర్లు అందరూ కూడా రోగులకు సాంత్వన కలిగించేందుకు వారిని అనునయించాల్సి ఉంటుందని, కాబట్టి వారు కూడా డాక్టర్లే అని అభిప్రాయపడ్డారు.మనం ఏ రంగంలో ఉన్నా ఒత్తిడి, సంతృప్తి రెండూ ఉంటాయని, వాటిని సమానంగా స్వీకరించాలని మానుషీ చిల్లర్ చెప్పారు.

అమ్మతనంలోని మాధుర్యం మాటల్లో చెప్పలేనిది అన్నారు. చాలామంది తన మాతృత్వాన్ని ఎలా అస్వాదిస్తారో ఓ డాక్టర్‌గా తాను చూశానని చెప్పారు. నేను మా అమ్మతో చాలా సన్నిహితంగా ఉంటానని చెప్పారు. తల్లిదండ్రులకు మనం ఎంత చేసినా తక్కువే అవుతుందన్నారు.సంకల్పం ఏదైనా దానిని సాకారం చేసుకునేందుకు మనం కృషి చేయాలని మానుషి చిల్లర్ అన్నారు. మన పని విషయంలో మనకు తరగని తపన ఉండాలని చెప్పారు. లక్ష్యం ఏదైనా చిత్తశుద్ధితో పని చేయాలని వ్యాఖ్యానించారు.