ఈ నాటకలతో ప్రతి ఒక్కరిని అలరించారు గొల్లపూడి...!

ప్రముఖ నటుడు, బహుముఖ ప్రజ్ఞాశాలి గొల్లపూడి మారుతీరావు కన్నుమూశారు. చైన్నై ఆస్పత్రిలో చికిత్స పొందుతూ ఆయన కన్నుమూశారు. 1939లో విజయనగరంలో ఆయన జన్మించారు. జోడీ చిత్రంలో ఆయన చివరి సారిగా నటించారు. 250కి పైగా చిత్రాల్లో గొల్లపూడి నటించారు. గొల్లపూడి మారుతిరావు మరణంతో టాలీవుడ్ విషాదంలో మునిగిపోయింది. గొల్లపూడి మారుతీ రావు సినిమాలలోకి రాకముందు అనేక నాటకాలలో ముఖ్య పాత్రలు పోషించారు. చిన్న వయస్సులో రాఘవ కళానికేతన్ పేరున నాటక బృందాన్ని నడిపిన గొల్లపూడి .. ఆడది , కుక్కపిల్ల దొరికింది, స్వయంవరం , రిహార్సల్స్, వాపస్ , మహానుభావులు వంటి నాటకాలకు నిర్మాణం, దర్శకత్వం వహించడంతో పాటు, ప్రధానపాత్రధారిగా నటించాడు. ఆంధ్ర విశ్వవిద్యాలయం రిజిస్ట్రార్ కె.వి.గోపాలస్వామి దర్శకత్వం వహించిన స్నానాలగది నాటకంలోనూ, భమిడిపాటి రాధాకృష్ణ రచించిన మనస్తత్వాలు నాటకంలోనూ నటించాడు గొల్లపూడి. మనస్తత్వాలు నాటకాన్ని ఢిల్లీలోని తల్కతోరా ఉద్యానవనంలో ప్రదర్శించారు. ఈ నాటకం ప్రతి ఒక్కరిని అలరించింది. ఇందుకు గాను అప్పటి సమాచార, ప్రసార శాఖామాత్యుడు బి.వి, కేశ్‌కర్ చేతుల మీదుగా అవార్డు అందుకున్నారు గొల్లపూడి. గొల్లపూడి చైనా ఆక్రమణ పై తెలుగులో మొట్టమొదటి నాటకం రచించి, చిత్తూరు, మదనపల్లె, నగరి లలో ప్రదర్శించగా వచ్చిన సుమారు యాభై వేల రూపాయల నిధులను ప్రధానమంత్రి రక్షణ నిధికి ఇచ్చాడు. ఇలా గొల్లపూడి నటుడిగా, రచయితగా అలరించాడు. బుల్లితెరపై కూడా తన మార్క్ చాటుకున్నారు గొల్లపూడి ప్రతిధ్వని అనే కార్యక్రమానికి మొదట్లో వ్యాఖ్యాతగా వ్యవహరించిన ఆయన అన్ని రంగాలకు చెందిన ప్రముఖులను ఇంటర్వ్యూ చేశాడు. ఇదీ కాక భార్యాభర్తల నేపథ్యంలో మనసున మనసై అనే కార్యక్రమాన్ని కూడా నిర్వహించాడు. ప్రజావేదిక, వేదిక, దూరదర్శన్, సినీ సౌరభాలు మొదలైన కార్యక్రామలని ఆయన నిర్వహించారు. వీటికి ఎంతో ప్రజాదరణ లభించింది. ఇంటింటి రామాయణం, గణపతి, ఎవరి గోల వారిదే, ప్రేమలు-పెళ్ళిళ్ళు, భార్యారూపవతీ శత్రుః, ఏది నిజం? అనే సీరియల్స్‌లోను గొల్లపూడి ముఖ్య పాత్రలు పోషించారు. ఆయన మరణం టాలీవుడ్ పరిశ్రమకి తీరని లోటు.