గ్లామర్ లేని గ్రామీణ యువతి లాంటి క్యారెక్టర్లు చేయాలని ఉంది : సోనాల్ చౌహాన్
cinema | Suryaa Desk | Published : Wed, Dec 18, 2019, 02:01 PM
బాలకృష్ణ నటిస్తున్న కొత్త చిత్రం రూలర్. సి కళ్యాణ్ నిర్మాత కాగా, కేఎస్ రవికుమార్ దర్శకత్వం వహిస్తున్నారు. రూలర్ సినిమాలో నాయికగా నటిస్తోంది సోనాల్ చౌహాన్. ఈ శుక్రవారం ప్రేక్షకుల ముందుకొస్తున్న రూలర్ చిత్రం గురించి ఆమె మాట్లాడుతూ…ఈ చిత్రంలో నాకు కీలక పాత్ర దక్కింది. నా క్యారెక్టర్ పేరు హారిక. తనకేం కావాలో, ఏం చేయాలో స్పష్టత ఉన్న యువతి. హీరోతో కొన్ని విషయాల్లో పోటీ పడుతుంటుంది. ఆయన జీవితంతో ముడిపడిన పాత్ర నాది. ఇంతవరకు బాలకృష్ణ గారిని మాస్ క్యారెక్టర్లలో చూసుంటారు. ఈ సినిమాలో క్లాస్ హీరోను చూస్తారు. ఆయన నటించిన రెండు పాత్రల్లో ఒక పాత్ర క్లాస్గా ఉంటుంది. బాలకృష్ణ గారి వల్లే నేను టాలీవుడ్లో సొంత పరిశ్రమలా ఉండగలుగుతున్నాను. కొన్ని హాస్య సన్నివేశాల్లో నేను నటించాను. ఈ సన్నివేశాలు చేస్తున్నప్పుడు చిత్ర బృందమంతా నవ్వింది. కొన్ని సందర్భాల్లో గ్లామర్గా కనిపిస్తాను. మరో నాయిక వేదికతో నాకు ఒకే ఒక్క సన్నివేశం కలిసి ఉంటుంది. కానీ ఆ సన్నివేశం చాలా పెద్దది. నటిగా నాకు ప్రతి చిత్రంలో భిన్నమైన పాత్రలు చేయాలని ఉంటుంది. కానీ మన దగ్గర నాయికలంటే తలపొగరుగా ఉండాలి, ఆ తర్వాత తనలో మార్పు రావాలి లాంటి క్యారెక్టర్లే ఉంటాయి. నాయికలంటే టైప్ కాస్టింగ్ చేసి, ఒకే తరహా పాత్రలు ఇవ్వడం కాదు, వాళ్లకూ అన్ని తరహా పాత్రలు దక్కాలి. గ్లామర్ లేని గ్రామీణ యువతి లాంటి క్యారెక్టర్లు చేయాలని ఉంది. అని చెప్పింది.
|
|