ఈ నెల 11 నుండి 31 వరకు థియేటర్స్ బంద్..

కరోనా ఎఫెక్ట్ చాలా రంగాలపై తీవ్ర ప్రభావం చూపిస్తోంది. చైనాలో వ్యాప్తి చెందుతున్న ఈ వైరస్ కారణంగా ఎంతో మంది చనిపోతున్నారు. కేవలం కరోనా వైరస్ చైనా దేశాన్నే కాదు..  ప్రపంచ దేశాలను సైతం వణికిస్తోంది. ఆర్థిక వ్యవస్థలకు మరింత ముప్పు ఉందని నిపుణులు హెచ్చరిస్తున్నారు. దీంతో అప్రమత్తమైన జనం పలు జాగ్రత్తలు తీసుకుంటున్నారు. గత వారం రోజుల నుంచి మన దేశంతో పాటు హైదరాబాద్‌లో కరోనా పాజిటివ్ కేసులు నమోదు కావడంతో జనాల్లో ఒక రకమైన అభద్రత భావం నెలకొంది. ఈ ఎఫెక్ట్ స్టాక్ మార్కెట్‌లపైనే కాదు.. షాపింగ్ మాల్స్, సినిమా థియేటర్స్, మల్టీప్లెక్స్‌లపై తీవ్ర ప్రభావం చూపిస్తోంది. ఇప్పటికే కరోనా ఎఫెక్ట్‌తో చాలా మాల్స్‌తో పాటు థియేటర్స్‌ ఇపుడు ఖాళీగా దర్శనమిస్తున్నాయి. ఇప్పటికే కరోనా వైరస్ కారణంగా  చైనా దేశవ్యాప్తంగా ఉన్న థియేటర్లు క్లోజ్ చేశారు. అంతేకాదు కొత్త సినిమాల విడుదలను కూడా ఆపేశారు.ఎక్కువమంది ఒక్క చోట ఉండే ప్రదేశాల్లో ఈ వైరస్ వ్యాపించే అవకాశం ఎక్కువగా ఉండటంతో ఈ నిర్ణయం తీసుకున్నట్టు సమాచారం.

తాజాగా కేరళలో కరోనాకు సంబంధించిన మరో ఆరు పాజిటివ్ కేసులు నమోదు కావడంతో తక్షణ చర్యల్లో భాగంగా అత్యధిక మంది గూమిగూడే ప్రదేశాలైన థియేటర్స్, మాల్స్, ఎగ్జిబిషన్‌కు సంబంధించిన వాటిని ఈ నెల 31 వరకు నిరవధికంగా బంద్ చేస్తున్నట్టు చెప్పారు. ప్రతి శుక్రవారం ప్రజలతో కిటకిటలాడే  థియేటర్స్‌ కూడా కరోనా వైరస్ కారణంగా ఎవరు రావడం లేదు. ఈ శుక్రవారం మార్చ్ 6న ఏకంగా అరడజన్ చిన్న సినిమాలు విడుదలయ్యాయి. కానీ ఆ సందడి మాత్రం బాక్సాఫీస్ దగ్గర కనిపించడం లేదు. ముఖ్యంగా కలెక్షన్స్ విషయంలో బాగా వెనకబడిపోయారు అంతా. ఎందుకంటే ఎన్ని సినిమాలు విడుదలైనా కూడా థియేటర్స్ వరకు ప్రేక్షకులు రావడం లేదు. కరోనా వైరస్ దెబ్బకు అస్సలు కొత్త సినిమాలు చూసే ఆలోచన కూడా చేయడం లేదు ఆడియన్స్. ఈ వారం అనుకున్నది ఒక్కటి అయినది ఒక్కటి.. ఓ పిట్టకథ.. పలాస 1978 సహా మరో మూడు సినిమాలు కూడా విడుదలయ్యాయి. కానీ అవి వచ్చినట్లు కూడా ఆడియన్స్‌కు తెలియదు.