ఆ మెయిల్ వచ్చాక నన్ను సినిమా నుండి తీసేసారు : విశ్వక్ సేన్

‘వెళ్లిపోమాకే’ సినిమాతో సినీ రంగంలోకి అడుగు పెట్టి త‌ర్వాత ‘ఈ న‌గ‌రానికి ఏమైంది’ సినిమాలో న‌లుగురు హీరోల్లో ఓ హీరోగా నటించి తన‌కంటూ ఓ ప్ర‌త్యేక‌మైన గుర్తింపును సంపాదించుకున్నాడు విశ్వ‌క్ సేన్‌. తర్వాత క‌థానాయ‌కుడిగా, ద‌ర్శ‌కుడిగా, నిర్మాత‌గా మారి చేసిన ‘ఫ‌ల‌క్‌నుమాదాస్‌’ సాధించిన విజ‌యంతో అంద‌రి దృష్టిలో పడ్డాడు. రీసెంట్‌గా విడుద‌లైన ‘హిట్‌’తో మ‌రో హిట్‌ను త‌న ఖాతాలో వేసుకున్న విశ్వ‌క్‌సేన్ త‌న కెరీర్ గురించి ఆస‌క్తిక‌ర‌మైన విష‌యాన్ని ఓ ఇంట‌ర్వ్యూలో చెప్పుకొచ్చారు. 

‘ఈ న‌గ‌రానికి ఏమైంది’ సినిమా షూటింగ్ స్టార్టై వారం రోజులు పూర్తైన త‌ర్వాత విశ్వక్ స్థానంలో ఇంకెవ‌రినో తీసుకున్నామ‌ని యూనిట్ స‌భ్యులు ఆయనకు ఫోన్ చేశారు. ఎందుకో కార‌ణం చెప్ప‌లేదు. అప్పుడు విశ్వ‌క్ సేన్‌.. చిత్ర ద‌ర్శ‌కుడు త‌రుణ్ భాస్క‌ర్‌కు ఫోన్ చేయ‌గా.. ఎవ‌రో అమ్మాయికి అవ‌కాశం ఇస్తాన‌ని చెప్పి విశ్వక్ మోసం చేసిన‌ట్లు.. ఆ అమ్మాయి మెయిల్ పెట్టింద‌ని చెప్పాడట‌. అప్పుడు విశ్వక్‌కి ఏం చేయాలో తెలియ‌లేదట‌. అప్పుడు ఆ మెయిల్‌ను త‌న‌కు ఫార్వ‌ర్డ్ చేయ‌మ‌ని త‌రుణ్‌ని అడిగాడ‌ట విశ్వ‌క్‌. స‌రేన‌ని త‌రుణ్ ఆ మెయిల్‌ను ఫార్వ‌ర్డ్ చేశాడట. 

ఆ మెయిల్‌లోని విష‌యం, రాసిన తీరు చూశాక‌... త‌న‌కు ప‌రిచ‌య‌మున్న వ్య‌క్తే ఆ మెయిల్ రాశాడ‌ని విశ్వ‌క్‌కి అర్థ‌మై అత‌న్ని వెళ్లి క‌లిసి... నిజం ఒప్పుకోమ‌ని బతిమాలాడాడ‌ట విశ్వ‌క్. కానీ.. ఆ వ్య‌క్తి విన‌లేదట‌. ఏం చేయాలో తెలియ‌క బాధ‌ప‌డుతుంటే.. క‌థ అనుకోని ట‌ర్న్ తీసుకుంద‌ట‌. ఏ అమ్మాయి పేరుపై మెయిల్ వ‌చ్చిందో.. ఆ అమ్మాయి త‌న పేరుని త‌ప్పుగా వాడుకున్నందుకు సైబ‌ర్ క్రైమ్ పోలీసుల‌కు ఫిర్యాదు చేసింద‌ట‌. దాంతో ఫేక్ మెయిల్ చేసిన వ్య‌క్తి నిజం ఒప్పుకోక త‌ప్ప‌లేదు. చివ‌ర‌కు విశ్వ‌క్‌సేన్‌ని ఈ న‌గ‌రానికి ఏమైంది సినిమాలో తీసుకున్నార‌ని, త‌న పాత్ర‌కు మంచి గుర్తింపు వ‌చ్చింద‌ని చెప్పారు విశ్వ‌క్ సేన్‌.