హ్యాపీ బర్త్ డే 'మెగా పవర్ స్టార్'

మెగాస్టార్ చిరంజీవి తనయుడిగా 'చిరుత' సినిమాతో తెరంగేట్రం చేసి తండ్రిలోని రాజసాన్ని, బాబాయ్ లోని పవర్ ని పుణికిపుచ్చుకోని మెగా పవర్ స్టార్ గా ఎదిగాడు రామ్ చరణ్. ఒక నటుడు కెరీర్ మొదట్లో ఎన్నో ఆటంకాలను ఎదుర్కొంటాడు. చిరంజీవి తనయుడు అయినా రామ్ చరణ్ కూడా అలా ఎన్నో ఆటుపోట్లను ఎదుర్కొన్నాడు.

చిరుత సమయంలో ఈ మెగా వారసుడు అసలు న‌టుడే కాద‌న్నారు. ఎక్స్‌ప్రెష‌న్స్ ఇవ్వ‌లేడ‌ని హేళన చేసారు. డాన్స్ తోనే నెట్టుకొస్తున్నాడని అదే పనిగా కామెంట్లు చేశారు. కానీ ‘రంగస్థలం’ అనే సినిమాతో తనలోని నటనను అంద‌రికీ చూపించాడు. కామెంట్లు చేసిన వారితోనే.. నటుడంటే ఇలానే ఉండాలని అనిపించుకున్నాడు.

అదిరిపోయే స్టెప్పులు, ఔరా అనిపించేలా చేసే యాక్షన్ సన్నివేశాలను చేస్తూ మొదటి సినిమా చిరుత సినిమా తోనే తన స్టామినా నిరూపించుకొని తనకంటూ ఒక ప్రత్యేక రూటును ఏర్పరుచుకున్నారు. మొదటి సినిమా తోనే ఉత్తమ నూతన నటుడిగా ఫిలింఫేర్ అవార్డు మరియు నందీ స్పెషల్ జ్యూరీ అవార్డులని అందుకున్నాడు. తర్వాత రాజమౌళి సినిమా తర్వాత 'మగధీర' సినిమా చరణ్ కెరీర్ ను పూర్తిగా మలుపుతిప్పింది. మ‌గ‌ధీర సినిమాతో కేవ‌లం ఒకే ఒక్క సినిమా అనుభ‌వం ఉన్న రామ్ చ‌ర‌ణ్ అప్ప‌టి వ‌ర‌కు ఉన్న 75 ఏళ్ల తెలుగు సినిమా చ‌రిత్ర రికార్డుల‌ను తిర‌గ‌రాసాడు. తెలుగు ఇండ‌స్ట్రీలో తొలిసారి 75 కోట్ల మార్క్ అందుకున్న హీరోగా స‌రికొత్త హిస్ట‌రీ క్రియేట్ చేసాడు.

తర్వాత తన స్టైల్ లో సినిమాలు చేసుకుంటూ వెళ్తున్న సమయంలో గోవిందుడు అందరివాడు, బ్రూస్లీ సినిమాలు చరణ్ కు బ్రేక్ వేసాయి. ఫ్లాపులకు కారణాలను వెతుక్కుంటూ కథల ఎంపికపై ద్రుష్టి పెట్టాడు. ఫ్లాపుల తర్వాత వచ్చిన ధృవ, రంగస్థలం సినిమాలు రామ్ చరణ్ కు సంపూర్ణ నటుడిగా పేరు తెచ్చిపెట్టాయి.

ఇక ఇప్పుడు రాజ‌మౌళి క్రేజీ మ‌ల్టీస్టార‌ర్ 'ఆర్ఆర్ఆర్' సినిమాతో బిజీగా ఉన్నాడు. ఈ సినిమాలో ఎన్టీఆర్‌తో కలిసి నటిస్తున్నాడు. ఉగాది సందర్భంగా విడుదలైన ఈ చిత్రం మోషన్ పోస్టర్‌కు మంచి రెస్పాన్స్ వచ్చింది. ఈ చిత్రంలో రామ్ చరణ్ అల్లూరి సీతారామరాజు పాత్రలో నటిస్తున్నడు.