సినీ కార్మికుల కష్టాలు తీరేదెన్నడో..!

కరోనా మహమ్మారితో కేంద్ర రాష్ట్ర ప్రభుత్వాలు విధించిన లాక్ డౌన్ కారణంగా సినిమా ధియేటర్ లలో పని చేసే ఉద్యోగులు ఆర్థిక ఇబ్బందులతో కొట్టుమిట్టాడుతున్నారు. మార్చి 22 నుంచి లాక్ డౌన్ నేపద్యంలో 90 రోజులుగా పని లేక సినిమా థియేటర్ లో పనిచేసే వర్కర్లు అన్నమో రామచంద్రా అని అలమటిస్తున్నారు. కొన్ని థియేటర్ల యాజమాన్యాలు మానవతా దృక్పథంతో సగం వేతనం కార్మికులకు ఇచ్చిన అవి సరిపోక కార్మికులు అనేక ఇబ్బందులు పడుతున్నారు. ఎవరైనా అగ్ర హీరోల సినిమాలు రిలీజ్ కావాలంటే మొదట గుర్తుకు వచ్చేది హైదరాబాద్ నగరంలోని ఆర్టీసీ క్రాస్ రోడ్ లో ఉన్న సినిమా థియేటర్లు. ఆర్టీసీ క్రాస్ రోడ్ లో సంధ్య 35 ఎంఎం, సంధ్య 70 ఎంఎం, సుదర్శన్ 35 ఎంఎం, దేవి 70ఎంఎం తో పాటు సప్తగిరి, శ్రీ మయూరి థియేటర్లు నడుస్తున్నాయి. ప్రతి థియేటర్ లో మేనేజర్ నుంచి 30 మంది కార్మికులు గత అనేక సంవత్సరాలుగా విధులు నిర్వహిస్తూ తమ కుటుంబ పోషణ కొనసాగిస్తున్నారు. ఉన్నఫలంగా కరోనా మహమ్మారి లాక్ డౌన్ నేపథ్యంలో సినిమా ధియేటర్లు ఒక్కసారిగా మూతపడడంతో సినిమా థియేటర్ లో పనిచేసే కార్మికుల కుటుంబాలు పడుతున్న ఇబ్బందులు అన్నీ ఇన్నీ కావు. సినిమా థియేటర్ లో పని చేసిన వారికి వేరే ఉపాధి లేకపోవడంతో ఇంటి అద్దెలు చెల్లించలేక తినడానికి తిండి లేక ఆకలితో అలమటిస్తున్న మని కార్మికులు ఆవేదన వ్యక్తం చేస్తున్నారు. సంధ్య 35 ఎంఎం, దేవి 70 ఎంఎం, సుదర్శన్ 35 ఎంఎం థియేటర్లలో పనిచేసే కార్మికులకు 50 నుంచి 70 శాతం వేతనాలు ఆయా థియేటర్ల యాజమాన్యాలు అందజేస్తున్నాయి. సంధ్య70 ఎంఎంలో పనిచేస్తున్న కార్మికులకు ఇప్పటి వరకు ఇలాంటి వేతనాలు ఇవ్వడం లేదనీ కార్మికులు పేర్కొంటున్నారు. ప్రజలకు వినోదాన్ని అందించే సినిమా థియేటర్లు మూసి వేయడం వల్ల అందులో పనిచేసే కార్మికులు, పరోక్షంగా ఆధారపడ్డ కార్మికులు కూడా నరకయాతన అనుభవిస్తున్నారు. కరోనా మహమ్మారితో మూతబడ్డ సినిమా థియేటర్లు ఎప్పుడు తెరుచుకుంటాయి తెలియదు కానీ, వేతనాలు సక్రమంగా రాక, ఇంటి అద్దెలు చెల్లించలేక కుటుంబ పోషణ భారమై సినిమా ధియేటర్ లలో పనిచేసే కార్మికులు ఇబ్బందులు పడుతున్నారు.ఇప్పటికైనా ప్రభుత్వం, కార్మిక శాఖ అధికారులు స్పందించి సినిమా ధియేటర్ లో పనిచేసే కార్మికులను ఆదుకోవడంతో పాటు వారికి ప్రత్యేక ప్యాకేజీ కింద నగదు అందజేసి వారి కుటుంబాలను ఆదుకోవాలని కార్మికులు కోరుతున్నారు.