స్విట్జర్లాండ్ రిసార్ట్ దుర్ఘటన,,,, షాంపెన్ బాటిల్, కొవ్వొత్తి వల్లే ప్రమాదం

స్విట్జర్లాండ్‌ ఆల్ప్స్ పర్వత ప్రాంతంలోని క్రేన్స్-మొంటానా స్కీ రిసార్ట్‌లో నూతన సంవత్సర వేడుకల్లో జరిగిన ఘోర అగ్నిప్రమాదంలో కనీసం 40 మంది సజీవదహనమయ్యారు. అయితే, ఈ సంఖ్య ఎక్కువే ఉంటుందని, సుమారు 100 మంది గాయపడ్డారని, వీరిలో చాలా మంది పరిస్థితి విషమంగా ఉందని పోలీసులు తెలిపారు. ఈ ప్రమాదానికి కారణం ఇంకా తెలియకపోయినా, కొవ్వొత్తిని సీలింగ్‌కు మరీ దగ్గరగా పెట్టడం వల్ల మంటలు అంటుకున్నాయని ఇద్దరు ప్రత్యక్ష సాక్షులు తెలిపారు. కాగా, ఇటీవల గోవా నైట్‌క్లబ్‌లో జరిగిన అగ్ని ప్రమాద ఘటనను తాజా సంఘటన గుర్తుచేసింది.

 వాలైస్ కాంటన్ పోలీసు కమాండర్ ఫ్రెడెరిక్ గిస్లర్ మాట్లాడుతూ... బార్‌లో పదుల సంఖ్యలో చనిపోయి ఉంటారని భావిస్తున్నట్లు తెలిపారు. అయితే, అగ్నిప్రమాదానికి గల కారణాన్ని నిర్ధారించడానికి ఇంకా సమయం పడుతుందని వాలైస్ కాంటన్ అటార్నీ జనరల్ బీట్రైస్ పిల్లౌడ్ చెప్పారు. ప్రమాదం నుంచి ప్రాణాలతో బయటపడిన ఫ్రాన్స్‌కు చెందిన ఎమ్మా, అల్బేన్‌లు ‘కొవ్వొత్తిని సీలింగ్‌కు మరీ దగ్గరగా పెట్టడం వల్ల అది అంటుకుంది’ అని తెలిపారు.

ప్రత్యక్ష సాక్షులు తెలిపిన వివరాల ప్రకారం... ఒక వెయిటర్ బర్త్‌డే క్యాండిల్స్‌ను షాంపైన్ బాటిళ్లపై పెట్టి, వాటిని సీలింగ్‌కి దగ్గరగా తీసుకెళ్లాడు. ‘కొన్ని క్షణాల్లోనే మొత్తం సీలింగ్‌కు మంట అంటుకుంది. అంతా చెక్కతోనే ఉంది’ అని తెలిపారు. మంటలు చాలా వేగంగా వ్యాపించడంతో అందులో నుంచి బయటపడటానికి ప్రయత్నించారు. మొత్తం సీలింగ్ తగలబడిపోయి.. మొదటి అంతస్తు పూర్తిగా మంటలకు ఆహుతయ్యిందని ఆ భయానక దృశ్యాన్ని వారు గుర్తు చేసుకున్నారు.

బయటకు వెళ్లే మార్గం చాలా ఇరుకుగా ఉండటం, మెట్లు ఇంకా ఇరుకుగా ఉండటంతో బయటపడటం చాలా కష్టమైందని వారు తెలిపారు. 200 మంది ప్రజలు 30 సెకన్లలో బార్ నుంచి బయటకు రావడానికి ప్రయత్నించారని వారు వివరించారు. మీడియా నివేదికల ప్రకారం బాధితులలో చాలా మంది 16 నుంచి 26 ఏళ్ల మధ్య వయసున్నవారే.

ఇది ఉగ్రవాద దాడి కాదని, కేవలం అగ్నిప్రమాదమని పోలీసులు స్పష్టం చేశారు. ఆ ప్రాంతాన్ని పూర్తిగా తమ అధీనంలోకి తీసుకున్నట్టు పోలీసులు ఒక ప్రకటనలో తెలిపారు. బాధితుల సంఖ్య చాలా ఎక్కువగా ఉండటంతో,ఆసుపత్రిలోని ఐసీయూలు, ఆపరేటింగ్ థియేటర్లు నిండిపోయినట్టు ప్రాంతీయ ప్రభుత్వ అధిపతి మథియాస్ రెనార్డ్ తెలిపారు. క్రేన్స్-మొంటానా అనేది స్విట్జర్లాండ్ రాజధాని బెర్న్‌కు సమీపాన వాలైస్ ప్రాంతంలోని ఆల్ప్స్ పర్వతాల నడిబొడ్డున ఉన్న ఒక విలాసవంతమైన స్కీ రిసార్ట్ పట్టణం. ఇది పర్యాటకులకు ఎంతో ఇష్టమైన ప్రాంతం.