కింగ్ ఆఫ్ విలన్స్... రాజనాల కాళేశ్వరరావు
cinema | Suryaa Desk | Published : Tue, Jul 21, 2020, 06:27 PM
తెలుగు తెరపై విలనిజానికి కొత్త భాష్యం చెప్పిన నటులలో రాజనాల పేరు ముందు వరుసలో తప్పకుండా ఉంటుంది. విలన్ పాత్రల్లో పెట్రేగిపోయిన రాజనాలని ‘దుష్ట నట చక్రవర్తి’ అంటూ అభినందించేవారు. నెల్లూరులో 1925 జనవరి 3న జన్మించిన రాజనాల అసలు పేరు... రాజనాల కాళేశ్వరరావు. 1952లో రాజమార్గం చిత్రం ద్వారా తెరపరిచితమైన రాజనాల ... 1953లో ప్రతిజ్ఞ చిత్రంలో ప్రతినాయకుడి పాత్రలో మెప్పించారు. ఆ తర్వాత వెనక్కి తిరిగి చూసుకోలేదు. జయసింహ, తెనాలి రామకృష్ణ, సువర్ణ సుందరి, బాంధవ్యాలు, నకిలీ మనిషి, కుటుంబ గౌరవం, వినాయక చవితి, రాజమకుటం, శ్రీ వెంకటేశ్వర మహత్యం, సహస్ర శిరచ్ఛేద అపూర్వ చింతామణి, ఉషా పరిణయం జగదేకవీరుని కథ, సిరిసంపదలు, గులేబకావలి కథ, చిట్టి తమ్ముడు, దక్ష యజ్ఞం...ఇలా అనేకానేక చిత్రాల్లో నటించారు. చేతికి ఎముక లేకుండా దానధర్మాలు చేసిన రాజనాల చరమాంకంలో ఆర్ధిక ఇబ్బందుల్లో మునిగిపోయారు. 1998 మే 21న ఆయన తుదిశ్వాస విడిచారు. నాలుగున్నర దశాబ్దాలు నటుడిగా తిరుగులేని ఆధిపత్యాన్ని కనబరిచారు.
|
|