మెగా కాంపౌండ్ లో యూవీ క్రియేషన్స్..

ఇప్పటివరకూ డార్లింగ్ ప్రభాస్ చిత్రాలకు కేరాఫ్ అడ్రస్ గా నిలిచిన యు.వి. క్రియేషన్స్.. ఇప్పుడు మెగా కాంపౌండ్ కి షిప్ట్ అవ్వబోతుందని ఇండస్ట్రీలో వార్తలు వినిపిస్తున్నాయి. తాజా సమాచారం మేరకు ఇద్దరు మెగా హీరోలతో బ్యాక్ టు బ్యాక్ మూవీస్ నిర్మించడానికి ఈ నిర్మాణ సంస్థ సన్నాహాలు చేస్తుందట.  యు.వి.క్రియేషన్స్. ప్రభాస్‌తో 'మిర్చి', 'సాహో' చిత్రాలను నిర్మించిన ఈ సంస్థ.. ఇప్పుడు 'రాధేశ్యామ్'ను సెట్స్‌పై ఉంచింది. ప్రభాస్‌కి మాతృ సంస్థ వంటి యు.వి... నానితో 'భలే భలే మగాడివోయ్', శర్వానంద్‌తో 'ఎక్స్ ప్రెస్ రాజా' వంటి చిత్రాలను కూడా నిర్మించింది. 

ఇప్పుడు మెగా పవర్ స్టార్ రామ్ చరణ్‌తో ఓ మెగా ప్రాజెక్టుకి శ్రీకారం చుట్టబోతుందట. 'ఆర్.ఆర్.ఆర్', 'ఆచార్య' తర్వాత చరణ్ యు.వి. సంస్థలోనే మూవీ చేయనున్నట్టు ఫిల్మ్ నగర్ టాక్. అయితే ఈ మూవీకి యు.వి.తో పాటు చరణ్ కొణిదెల ప్రొడక్షన్ కంపెనీ నిర్మాణ భాగస్వామిగా ఉండనుందట. 'భీష్మ' డైరెక్టర్ వెంకీ కుడుమల ఈ చిత్రానికి దర్శకత్వం వహించనున్నాడు. ప్రస్తుతం ఈ సినిమా ప్రీ-ప్రొడక్షన్ దశలో ఉంది. గతంలో రామ్ చరణ్ 'రంగస్థలం', 'వినయ విధేయ రామ' సినిమాలకు డిస్ట్రిబ్యూటర్ గా వ్యవహరించింది యు.వి. రామ్ చరణ్‌తో పాటు... మెగా ప్రిన్స్ వరుణ్ తేజ్‌తోనూ ఓ సినిమా నిర్మించడానికి యు.వి. క్రియేషన్స్ సన్నాహాలు చేస్తోందట. తమ సంస్థలో 'ఎక్స్ ప్రెస్ రాజా' చిత్రానికి దర్శకత్వం వహించిన మేర్లపాక గాంధీ ఈ మూవీని డైరెక్ట్ చేయబోతున్నట్లు సమాచారం. ప్రస్తుతం మేర్లపాక నితిన్‌తో 'అంధాధున్' రీమేక్ తెరకెక్కించే పనిలో ఉన్నాడట. వరుణ్ కూడా కిరణ్ కొర్రపాటితో బాక్సింగ్ డ్రామా... ఆ తర్వాత 'ఎఫ్-2' సీక్వెల్ లైన్‌లో ఉంచాడు. మరి బ్యాక్ టు బ్యాక్ ఇద్దరు మెగా కాంపౌండ్ హీరోలతో మెగా ప్రాజెక్టులను సెట్ చేసిన యు.వి.క్రియేషన్స్ ఆ మూవీస్ తో ఎలాంటి విజయాలు అందుకుంటుందో చూడాలి.