రాజకీయాలంటే బాబాయ్‌ని చంపినంత ఈజీ కాదు: విపక్షాలకు సీఎం చంద్రబాబు స్ట్రాంగ్ వార్నింగ్

నందమూరి తారకరామారావు 30వ వర్ధంతి వేడుకల్లో భాగంగా ముఖ్యమంత్రి చంద్రబాబు నాయుడు ప్రత్యర్థులపై నిప్పులు చెరిగారు. రాజకీయం చేయడం అంటే సొంత బాబాయ్‌ని చంపినంత సులభం కాదని ఆయన ఘాటు వ్యాఖ్యలు చేశారు. రాష్ట్రంలో ప్రస్తుతం ఉన్నది ఎన్డీయే ప్రభుత్వమని, ఇక్కడ ఉన్నది చంద్రబాబు అని గుర్తుపెట్టుకోవాలని హెచ్చరించారు. చిల్లర రాజకీయాలకు పాల్పడితే సహించేది లేదని, చట్టం తన పని తాను చేసుకుపోతుందని స్పష్టం చేశారు.
తెలుగుదేశం పార్టీ కార్యకర్తల క్రమశిక్షణ, నిరంతర కృషి వల్లే తాను ఈరోజు ముఖ్యమంత్రిగా ఈ స్థానంలో ఉన్నానని చంద్రబాబు భావోద్వేగంగా పేర్కొన్నారు. తాను ఎప్పుడూ అధికారం కోసం ఆరాటపడలేదని, ప్రజా సేవయే తన పరమావధి అని వెల్లడించారు. పార్టీ పట్ల కార్యకర్తలకు ఉన్న నిబద్ధత అసమానమైనదని, టిడిపి కుటుంబ సభ్యుల అండదండలు ఉన్నంత కాలం పార్టీకి ఎలాంటి ఢోకా లేదని ఆయన ధీమా వ్యక్తం చేశారు.
పార్టీ కార్యకర్తల త్యాగాలను స్మరిస్తూ చంద్రబాబు ఆసక్తికర వ్యాఖ్యలు చేశారు. గొంతు మీద కత్తి పెట్టి తెలుగుదేశం పార్టీని విడిచిపెట్టమని బెదిరించినా, ప్రాణాలను సైతం లెక్కచేయకుండా పార్టీ జెండాను మోసే కార్యకర్తలు మనకున్నారని కొనియాడారు. ఇలాంటి సైనికులు ఉన్నంత కాలం పార్టీ అజేయంగా నిలుస్తుందని ఆయన పేర్కొన్నారు. కార్యకర్తలే పార్టీకి అసలైన బలమని, వారి సంక్షేమం కోసం ప్రభుత్వం ఎల్లప్పుడూ కృషి చేస్తుందని హామీ ఇచ్చారు.
ఎన్టీఆర్ ఆశయ సాధన కోసం ప్రతి ఒక్కరూ పునరంకితం కావాలని చంద్రబాబు పిలుపునిచ్చారు. క్రమశిక్షణతో కూడిన రాజకీయాలే తెలుగుదేశం పార్టీ మార్క్ అని, ప్రజాస్వామ్య విలువలను కాపాడుకుంటూ రాష్ట్రాన్ని అభివృద్ధి పథంలో నడిపిస్తామని చెప్పారు. ప్రత్యర్థులు ఎన్ని కుట్రలు చేసినా ప్రజల మద్దతుతో వాటిని తిప్పికొడతామని, అభివృద్ధి పనుల్లో ఎక్కడా రాజీ పడబోమని ఆయన ఈ సందర్భంగా స్పష్టం చేశారు.