సినిమా రివ్యూ:'అతిథి దేవోభవ'

పొలిమేర నాగేశ్వ‌ర్ దర్శకత్వంలో ఆది సాయికుమార్‌, నువేక్ష‌ హీరోహీరోయిన్లుగా తెరకెక్కిన 'అతిథి దేవోభవ' సినిమా శుక్రవారం థియేటర్లలో విడుదలైంది. కథలోకి వెళ్తే.. హీరోకి ఓ మానసిక సమస్య ఉంటుంది. అతడు ఒంట‌రిగా ఉండ‌టాన్ని చావుతో స‌మానంగా భావిస్తాడు. అతడి స‌మ‌స్య‌ను వైద్య ప‌రిభాష‌లో మోనోఫోబియా అంటారు. ఏ ప‌రిస్థితుల్లోనైనా ఒంట‌రిగా ఉండాల్సి వ‌స్తే వెంటనే ఆత్మ‌హ‌త్య‌కు పాల్ప‌డే ప్ర‌య‌త్నం చేస్తాడు. అందుకే ఈ సినిమా హీరో న‌లుగురు మ‌ధ్య జీవించ‌డానికే ఇష్ట‌ప‌డుతుంటాడు. త‌న‌కున్న ఈ లోపం కార‌ణంగానే తాను ప్రేమించిన ఓ అమ్మాయిని దూరం చేసుకుంటాడు. ఆ బాధ‌లో ఉన్న అతను హీరోయిన్ ని తొలి చూపులోనే ప్రేమిస్తాడు. ఆమెకి కూడా అతగానిపై ప్రేమ క‌లుగుతుంది. అయితే త‌న లోపం గురించి తెలిస్తే ఆమె కూడా దూర‌మ‌వుతుంద‌నే భ‌యంతో ఆ విష‌యాన్ని దాచి పెట్టే ప్ర‌య‌త్నం చేస్తాడు. ఈ క్ర‌మంలో కొన్ని అనుకోని సంఘ‌ట‌న‌ల వ‌ల్ల హీరోను సైకోగా భావించి పోలీసులు అరెస్టు చేస్తారు. మ‌రి ఆ త‌ర్వాత ఏమైంది? ఈ సినిమాలో హీరోకి ఎదురైన స‌మ‌స్య‌లేంటి? ఆ చిక్కుల నుంచి అతడెలా బ‌య‌ట‌ప‌డ్డాడు? త‌న ప్రేమ‌ను ఎలా కాపాడుకున్నాడు? అన్న‌ది సినిమా చూస్తే తెలుస్తుంది. మ‌నిషికున్న లోపాల‌ను ఆధారంగా ఇప్పటికే ‘భలే భ‌లే మ‌గాడివోయ్‌’, ‘మ‌హానుభావుడు’, ‘మంచి రోజులొచ్చాయి’ వంటి సినిమాలు వచ్చాయి. ఈ త‌ర‌హా క‌థాంశాల‌తో రూపొందిన‌ ‘అతిథి దేవోభ‌వ‌’ సినిమాను ద‌ర్శ‌కుడు పొలిమేర నాగేశ్వ‌ర్ కొంత థ్రిల్ల‌ర్ కోణంలోనూ, ఇంకాసేపు వినోదాత్మ‌క కోణంలోనూ చూపించే ప్ర‌య‌త్నం చేశారు. కానీ ఈ సినిమాలోని సన్నివేశాలు ప్రేక్ష‌కుల్ని మెప్పించేలా లేవు. హీరో మోనోఫోబియాను ప‌రిచయం చేస్తూ వ‌చ్చే స‌న్నివేశాలు కాస్త ఆస‌క్తిక‌రంగానే అనిపిస్తాయి. కానీ, అక్క‌డి నుంచి వినోదంతో కూడిన థ్రిల్‌ ఇవ్వాలనే ద‌ర్శ‌కుడి ప్ర‌య‌త్నం ఫలించలేదు. అభ‌య్ పాత్ర‌లో హీరో ఆది బాగా నటించారు. నువేక్ష తెర‌పై అందంగా క‌నిపించింది. ఆది త‌ల్లి పాత్ర‌లో రోహిణి ఒదిగిపోయారు. స‌ప్త‌గిరి కామెడీ ట్రాక్ అంత‌గా పేలలేదు. శేఖ‌ర్ చంద్ర అందించిన మ్యూజిక్ బాగుంది.
ప్లస్ పాయింట్స్: క‌థాంశం, హీరో ఆది యాక్టింగ్, శేఖ‌ర్ చంద్ర మ్యూజిక్
మైనస్ పాయింట్స్: సాగ‌తీత స‌న్నివేశాలు, ఫస్ట్ హాఫ్, క్లైమాక్స్

నటీనటులు: ఆది సాయి కుమార్‌, నువేక్ష‌, రోహిణి, స‌ప్త‌గిరి తదితరులు
దర్శకత్వం : పొలిమేర నాగేశ్వర్, నిర్మాత: రాజబాబు మిర్యాల, అశోక్ రెడ్డి మిర్యాల,సంగీత దర్శకుడు: శేఖర్ చంద్ర,సినిమాటోగ్రఫీ: అమరనాథ్ బొమ్మిరెడ్డి,ఎడిటర్ : కార్తీక్ శ్రీనివాస్. రేటింగ్ 2.5/5.