పుట్టిన రోజునాడే తుదిశ్వాస విడిచిన వెటరన్ యాక్టర్
cinema | Suryaa Desk | Published : Sat, Apr 09, 2022, 12:05 PM
నటుడిగా, దర్శకుడిగా, నిర్మాతగా తెలుగు చిత్రసీమ పై చెరగని ముద్ర వేసిన సీనియర్ యాక్టర్ బాలయ్య తుది శ్వాస విడిచారు. హైదరాబాద్, యూసుఫ్ గూడలోని తన స్వగృహంలో అనారోగ్య కారణాలరీత్యా బాలయ్య కన్నుమూసినట్టు ఆయన కుటుంబ సభ్యులు మీడియాకు తెలిపారు. ఏప్రిల్ 9,1930లో గుంటూరులో జన్మించిన బాలయ్య గారు అదే తేదీన మరణించటం బాధాకరం.
తెలుగు చిత్రసీమలో ఎత్తుకు పై ఎత్తు సినిమాతో అరంగేట్రం చేసిన బాలయ్య పూర్తి పేరు మన్నవ బాలయ్య. దాదాపు 300పై చిలుకు చిత్రాలలో నటించి తెలుగు ప్రేక్షకుల హృదయాల్లో స్థానం సంపాదించుకున్నారు. కెరీర్ తొలినాళ్లలో నటించిన పార్వతి కళ్యాణం, కుంకుమ రేఖ, భాగ్య దేవత వంటి చిత్రాలు నటుడిగా బాలయ్యకు మంచి గుర్తింపునిచ్చాయి.
ఆయన కథ అందించి, తన సొంత బ్యానర్ ఐన అమృత ఫిలిమ్స్ పై నిర్మించిన చెల్లెలి కాపురానికి నంది అవార్డు వచ్చింది. ఇంకా నేరము-శిక్ష, అన్నదమ్ముల కథ వంటి చిత్రాలకు బాలయ్య కథలనందించారు. 2012 లో బాలయ్య రఘుపతి వెంకయ్య అవార్డును అందుకున్నారు. పలు టీవీ సీరియల్స్ లోనూ బాలయ్య నటించారు. బాలయ్యకు ముగ్గురు సంతానం హర్షలత, మోహిని లత, తులసీరామ్ రాంప్రసాద్. బాలయ్య మృతి పట్ల పలువురు సినీ ప్రముఖులు సంతాపం వ్యక్తం చేసారు.
|
|