ఆపరేషన్ సిందూర్‌లో పాక్‌కు చైనా అండ?.. సంచలన వివరాలు వెలుగులోకి

China తొలిసారిగా Pakistanకు “ఆపరేషన్ సిందూర్” సమయంలో సాంకేతిక సహాయం అందించిన విషయాన్ని పరోక్షంగా అంగీకరించినట్లు అంతర్జాతీయ మీడియా కథనాలు పేర్కొంటున్నాయి. పాకిస్తాన్‌కు తమ ఇంజనీర్లు ప్రత్యక్షంగా ఆన్‌గ్రౌండ్ టెక్నికల్ సపోర్ట్ ఇచ్చినట్లు చైనా ప్రభుత్వ మీడియా వెల్లడించినట్టు సమాచారం.South China Morning Post కథనం ప్రకారం, 2025 ఏప్రిల్ 22న జరిగిన పహల్గామ్ ఉగ్రదాడికి ప్రతీకారంగా భారత్ “ఆపరేషన్ సిందూర్” చేపట్టింది. ఈ ఆపరేషన్‌లో భాగంగా జైషే మహ్మద్, లష్కరే తోయిబా, హిజ్బుల్ ముజాహిదీన్‌కు చెందిన కీలక స్థావరాలపై భారత దళాలు దాడులు జరిపి, వంద మందికి పైగా ఉగ్రవాదులను హతమార్చినట్లు నివేదికలు తెలిపాయి. అదే సమయంలో పాకిస్తాన్ నుంచి వచ్చిన ప్రతిస్పందనకు భారత్ గట్టిగా సమాధానం ఇచ్చి, పాక్ వైమానిక స్థావరాలను కూడా లక్ష్యంగా చేసుకున్నట్లు సమాచారం.చైనా ప్రభుత్వ టెలివిజన్ China Central Television (CCTV)కు ఇచ్చిన ఇంటర్వ్యూలో Aviation Industry Corporation of China (AVIC) ఇంజనీర్లు ఈ అంశాలను వెల్లడించారు. పాకిస్తాన్‌కు మద్దతు అందించిన బృందంలో చెంగ్డు ఎయిర్‌క్రాఫ్ట్ డిజైన్ అండ్ రీసెర్చ్ ఇన్‌స్టిట్యూట్‌కు చెందిన ఇంజనీర్ జాంగ్ హెంగ్ కూడా ఉన్నారని పేర్కొన్నారు. ఈ సంస్థ తయారు చేసే అధునాతన యుద్ధ విమానాలు, డ్రోన్లను పాకిస్తాన్ వినియోగిస్తోంది.“మేమున్న సపోర్ట్ బేస్‌లో నిరంతరం యుద్ధ విమానాల శబ్దాలు, ఎయిర్ రైడ్ సైరన్లు వినిపించేవి. తీవ్ర ఎండల మధ్య పని చేయడం చాలా క్లిష్టంగా అనిపించింది” అని జాంగ్ హెంగ్ వ్యాఖ్యానించినట్లు కథనాలు తెలిపాయి. అలాగే, తమ యుద్ధ పరికరాలు పూర్తి సామర్థ్యంతో పనిచేయాలని ఆశించామని, ఇది కేవలం J-10CE యుద్ధవిమానాల ప్రతిష్ఠకే కాకుండా చైనా-పాక్ సాంకేతిక సహకారానికి కూడా నిదర్శనమని ఆయన పేర్కొన్నట్లు సమాచారం.ఇంకో ఇంజనీర్ జుడా మాట్లాడుతూ, ఈ యుద్ధవిమానాలను ఎంతో జాగ్రత్తగా నిర్వహించామని, సరైన పరిస్థితుల్లో అవి అద్భుత ఫలితాలు ఇస్తాయని తమకు ముందే నమ్మకం ఉందని చెప్పారు.ఈ వ్యాఖ్యలతో పాకిస్తాన్‌కు చైనా ప్రత్యక్ష సాంకేతిక మద్దతు అందించిందన్న వాదనలకు మరింత బలం చేకూరిందని విశ్లేషకులు అభిప్రాయపడుతున్నారు. ఇప్పటికే పాకిస్తాన్ చైనా నుంచి 36 J-10CE ఫైటర్ జెట్లు, 250 PL-15 క్షిపణులను కొనుగోలు చేసింది. ఇదే అంశంపై భారత సైన్యం కూడా గతంలో స్పందిస్తూ, పాకిస్తాన్ వినియోగిస్తున్న రక్షణ సామగ్రిలో అధిక భాగం చైనా తయారీదేనని పేర్కొంది. పాకిస్తాన్‌ను చైనా ఒక “లైవ్ ల్యాబ్”లా ఉపయోగించుకుంటోందని భారత్ ఆరోపించిన విషయం తెలిసిందే.